Æфсæддонтæм æмæ сæ бинонтæм цæуы алывæрсыг цæстдард
2024 азы ноябры Цæгат Ирыстоны байгом æфсæддон-социалон центр, сæрмагонд æфсæддон операцийы чи архайы, уыцы хæстонтæн æххуыс кæнынæн. Æфсæддонтæм æмæ сæ бинонтæм цæуы алывæрсыг цæстдард. Центр æххуыс кæны æбæрæгæй чи фесæфт, уыцы хæстонты агурынæн дæр. Куыст цæуы Слестгæнæн комитетимæ æмæ Мидхъуыддæгты министрадимæ иумæ. Бæлвырддæр радзурдзæн Чехойты Фатимæ.
Сæрмагонд æфсæддон операцийы архайæг Кокойты Давид хæстмæ мобилизацигонд æрцыд 2023-æм азы январы. Уæрæсейы æфсады рæнхъытæм бархийæ бацыд. Йæ фыды фæстæ йæ бафæндыд хæстмæ ацæуын. Йæ мад Каджаты Людмилæйы ныхæстæм гæсгæ, фарон декабры «Дато»- ахæм у Давиды фæсномыг, йæ хæстон хæс æххæст кæнынмæ куы ацыд, уæдæй фæстæмæ дзы ницы хабар уал фехъуыста. Уæд Людмилæ фарста иннæ æфсæддонты йæ фырты тыххæй, фæлæ йын бæлвырдæй базонын ницы бантыст.
Мады зæрдæ æууæнды, йæ фырт кæй разындзæн, ууыл. Людмилæ уыд Уæрæсейы хъахъхъæнынады министрады æфсæддон-социалон центры цæгатирыстойнаг хайады. Куыстуат ис «Фыдыбæстæ хъахъхъæнджыты» фонды фæзы. Уым Каджаты Людмилæ фехъусын кодта, йæ фырт сæрмагонд æфсæддон операцийы зонæйы æбæрæгæй кæй фесæфт, уый. Æфсæддон-социалон центры кусджытæ бафыстой сгарæн гæххæтт æмæ райстой генетикон æрмæджытæ.
Æбæрæгæй чи фесæфт, уыдоны агурæн мадзæлттæ æнцон сты. Уый тыххæй фехъусын кæнын хъæуы хабар æфсæддон-социалон центрмæ æмæ уырдæм бадæттын хæстæгдзинад æвдисæг гæхæттыттæ. Уымæй уæлдай ма хъæуы æрбахæссын æфсæддоны хуысистытæ сгарæн гæххæттыл бафидар кæнынæн. Сæрмагонд æфсæддон операцийы архайджытæй æбæрæгæй чи фесæфт, уыдоны агурæн мадзæлттæ æххæст кæнынц Слестгæнæн комитетимæ æмæ Мидхъуыддæгты министрадимæ иумæ.
Уæрæсейы Президенты уынаффæмæ гæсгæ æбæрæгæй чи фесæфт, уыцы æфсæддонты сывæллæттæн паддзахад кæны социалон æххуыс. Исынц æй алы мæй дæр.
