Горæт хъахъхъæныны æмæ уæгъд кæныны архайдта Цæгат Ирыстонæй рацæугæ 3 мин адæймагæй фылдæр
Ленинграды блокадæ æххæстæй ист куы рæцыд, уыцы боны кадæн республикæйы мидхъуыддæгты министрады историйы музейы арæзт æрцыд акци. Ленинграды блокадæ ахаста 872 боны. Уыйбæрц рæстæг хъæбатыр горæты цæрджытæ быхстой æххормагæн æмæ хъизæмæрттæн. 81 азы размæ советон æфсæдтæн бантыст знаджы Ленинграды арæнтæй аппарын. Горæт хъахъхъæныны æмæ уæгъд кæныны архайдта Цæгат Ирыстонæй рацæугæ 3 мин адæймагæй фылдæр. Бæлвырддæр радзурдзæн Хъайтмазты Дзерассæ.
1944-æм азы Лениград ахæмæй хъуыды кæны Фыдыбæстæйы Стыр хæсты ветеран Пагæты Алыксандр. Ацы мысинæгтæ фронтовик дзуры тыхы структурæты кусджытæн, Ленинграды блокадæ æххæстæй ист куы рцыд, уыцы боны кадæн акцийы рæстæг. 18-аздзыд Пагæты Алыксандрæн йæ хæстон фæндаг райдыдта 1942-æм азы, службæ кодта танкты ныхмæ æфсæдты. Зноны скъоладзау тох кодта Дард Скæсæны, Мæскуыйы бын… Ацыд мингай километртæ. 44-æм азы Выборгы полчы хсæн дивизийы хыгъды архайдта Ленинграды блокадæ басæттыны.
Горæт уæгъд кæныны тохты фæцæф ис, фæлæ фæстæмæ æрлæууыд хæстон рæнхъыты. Булкъон Пагæты Алыксандр уыд, Ирыстонæй Ленинграды фронты чи хæцыд, уыцы 3 мин адæймаджы хыгъды.
Номарæн мадзалы архайдтой стажертæ, мидхъуыддæгты министрады, Уæрæсейы гвардийы кусджытæ. Акци арæзт æрцыд министрады историйы музейы. Ис дзы 9 залы. Уыдонæй иу баст у Фыдыбæстæйы Стыр хæстимæ. Алы предмет дæр дзы у æфсæддонты хъæбатырдзинады æвдисæн.
Фæлтæрæй фæлтæрмæ хъахъхъæнын æппæты карздæр хæсты тыххæй намыс, фæсивæды хъомыл кæнын хистæрты хъæбатырдзинады дæнцæгыл. Уый у ахæм патриотон акциты нысан. Мидхъуыддæгты министрады куыд фехъусын кодтой, афтæмæй Стыр Уæлахизы 80 азы кадæн бацæттæ кодтой номарæн мадзæлтты æнæхъæн цикл.
Сæхиуыл нæ ауæрдгæйæ, советон салдæттæ горæты цæрджытæн гом кодтой царды фæндаг, тох кодтой адæмы сæрибардзинадыл. Ветеранты бирæ хæрзиуджытæ сты, Уæлахизмæ фæндаг куыд даргъ æмæ уæззау уыдис, уый æвдисæн.
