Ныр сывæллон ныййарыны ныхмæ мадзæлттæ нæй æвдисæн интернеты, дзыллон информацийы фæрæзты, кино æмæ рекламæйы
Царды дидинджытæ, фидæн æмæ ныфс. Ацы хуымæтæг ныхæстæй рагæй æрæгмæ дæр хонæм сывæллæтты. Фæлæ фæстаг рæстæг бирæтæ ууыл райдыдтой дызæрдыг кæнын. Бæлвырддæр та сæм æнæ кæстæртæй цард кæсы æнцондæр, хуыздæр æмæ ирддæр. Уыцы нырыккон змæлдимæ разы не сты бинонты хæзнатæ хъахъхъæнджытæ æмæ ма закъон дæр. Чехойты Фатимæйæн ныхасы бар.
Бирæсывæллонджын бинонтæ сæ цард фервитынц хъæлдзæгæй. Химилонты Зæринæйы ныхæстæм гæсгæ, æнкъард никуы фæкæнынц. Бирæсывæллонджын мад куыд зæгъы, уымæ гæсгæ рагæй бæллыд стыр бинонтæм. Йæ бинойнаг Чибиты Ирбегимæ сын ис 5 сывæллоны – 4 лæппуйы æмæ чызг. Ныййарджыты ныхæстæм гæсгæ, кæстæрты хъомыл кæнын кæд зын у, уæддæр дæтты æхсызгондзинад. Æххуыс сын кæнынц сæхи ныййарджытæ. Сывæллæттæ сты цæрдæг, цæуынц алыхуызон секцитæм. Зæринæйы ныхæстæм гæсгæ, сæйраг дæр сты уарзондзинад, æмбарынад æмæ æнувыддзинад.
Ивгъуыд аз ноябры Уæрæсейы президент бафыста закъон, цæмæй чайлдфри парахатгонд ма цæуа, уый тыххæй. Ныр сывæллон ныййарыны ныхмæ мадзæлттæ нæй æвдисæн интернеты, дзыллон информацийы фæрæзты, кино æмæ рекламæйы. Ахæм хъуыдытæ нæй парахат кæнын рæзгæ фæлтæры *хсæн, æнæхъомыл чызджыты æмæ лæппуты уыцы информацийæ хъахъхъæнын бахæс кодтой хицаудзинады оргæнтæн.
Закъонхалджытæ æййафдзысты административон æфхæрд. 100 мин сомы ивар фиддзысты адæм, юридикон бæрнондзинад кæуыл ис, уыдон – милуан сомы онг, кæнæ сæ бафхæрæн уыдзæн 90 суткæмæ сæ административон архайд æрлæууын кæнынæй. Уыцы хъæппæрисыл сразы сты республикæйы Æхсæнадон палатæйы уæнгтæ дæр.
Чайлдфри парахат кæныныл нымад не сты моладзаны тыххæй хъусынгæнинæгтæ: йæ царды æмæ бинонты уавæры тыххæй хабæрттæ.
Сывæллæттæ ныййарыны ныхмæ пропагандæ зиан хæссы æхсæнадæн. Закъон фидардæр кæндзæн бинонты хæзнатæ, фæхуыздæр кæндзæн бæстæйы демографийы уавæр.
