Советы уæнгтæ бæстон æркастысты Дзæуджыхъæуы цæрæн микрорайон аразыны фарстамæ
Хицауады Сæрдар Дзанайты Барисы разамындæй арæзт æрцыд инвестициты Советы æмбырд. Архайдтой дзы министрадты æмæ ведомствоты разамонджытæ, Парламенты депутаттæ, муниципалон скондты сæргълæуджытæ æмæ Цæгат Ирыстоны бизнес-æхсæнады минæвæрттæ. Советы уæнгтæ бæстон æркастысты Дзæуджыхъæуы цæрæн микрорайон аразыны фарстамæ. Уыдзæн дзы 2 мины 500 фатеры. Уыимæ, «Уæрæсейаг бинонтæн цæрæнуæттæ» дæттыны федералон программæйы чи архайы, уыдонæн. Ам ма арæзт æрцæудзысты æндæр бæстыхæйттæ. Сæ фæзуат уыдзæн 12 мин квадратон метры. Сæ иу хайы æрбынат кæндзысты социалон инфраструктурæйы объекттæ – аивæдты скъола, кафе, дукани, спортивон комплекс, супермаркет æмæ аивдзинады салон. Уымæй дарддæр, инвесторты хъуыдымæ гæсгæ, проект фадат ратдзæн 100 куысты бынаты скæнынæн. Абон нæ регионы территорийы арæзт цæуы хорз инвестицион климат, – загъта Дзанайты Барис, æмæ ма бафтыдта амалхъом адæм хъуамæ æххæстæй кæй æххæст кæной бадзырдмæ гæсгæ цы снысан кодтой, уыцы хъуыддæгтæ.
