Архайдтой дзы 100 спортсменæй фылдæр республикæйы скъолаты, училищæты æмæ техникумты ахуыргæнинæгтæ
Цæгат Ирыстоны физкультурон-спортивон æхсæнадон æмбырд «Национ спорты хуызты, ивазæнты æмæ культурæйы федераци», стæй республикæйы физкультурæ æмæ спорты министрад сарæзтой ерыстæ национ хъæзтытæй. Архайдтой дзы 100 спортсменæй фылдæр республикæйы скъолаты, училищæты æмæ техникумты ахуыргæнинæгтæ. Уæлахиздзаутæн саккаг кодтой Кады гæххæттытæ æмæ майдантæ. Чехойты Фатимæйæн ныхасы бар.
Ацы лæппутæ æмæ чызджытæ чъоппæй хъазын æмæ ныхмæлæууæджы, къæцæлыл хæцгæйæ, сæ хаймæ раивазын сæ фыдæлтæй æвзæрдæр нæ арæхсынц. Дзæуджыхъæуы 13-æм скъолайы 8-æм къласы ахуырдзау Багаты Арсены ерыстæм цæттæ кодта скъолайы физкультурæйы ахуыргæнæг. Лæппу хъазты фæрæз – фысы цармы гæппæл згъæр цæппузырыл фидаргондæй йæ къахæй сæппæрста 18 хатты.
Ерысты архайдтой 100 спортсменæй фылдæр: 2004 – 2013-æм азты гуырд лæппутæ æмæ чызджытæ. Сæхи лæмбынæг цæттæ кодтой. Алчидæр сæ тырныдта уæлахиздзау суæвыныл.
Змейкæйы 1-æм скъолайы 10-æм къласы ахуырзау Тараты Астемыр ивазæнты 80 кг уæзы сси уæлахиздзау. Уый хæцыди 2008 – 2009-æм азты гуырд лæппуты *хсæн. Ацы ерысты ныр æртыккаг аз архайы.
Национ хъæзтытæ цымыдисаг сты æрыгон фæлтæрæн. Чсиаты Викторияйæн йæ дыууæ фырты дæр архайынц ерысты. Ныййарæджы ныхæстæм гæсгæ, лæппутæ ивазæнты къордмæ цæуын тынгдæр сразæнгард сты, нæ фыдæлты ацы спорты хуызæй ерыс кодтой, уый куы базыдтой, уæд.
Ерыстæ национ хъæзтытæй – ивазæнтæй æмæ чъоппæй сарæзтой Цæгат Ирыстоны республикон физкультурон-спортивон æхсæнадон æмбырд «Национ спорты хуызты, ивазæнты æмæ культурæйы федераци» стæй республикæйы физкультурæ æмæ спорты министрад. Сæ нысан у – республикæйы национ спорты хуызтæ æмæ адæмон хъæзтытæ парахат кæнын.
Сæ тыхтæ ивазæнтæй æмæ чъоппæй чи фæлвæрдта, уыдон равдыстой стыр техникон цæттæдзинад æмæ хъару. Уæлахиздзаутæн саккаг кодтой Кады гæххæттытæ æмæ майдантæ. Уыдонæй арæзт æрцæудзæн республикæйы командæ Уæрæсейы чемпионаты архайынмæ.
