Цыколайы ног спорткомплекс æмæ хистæр кары фæлтæрæн центр
Кусæг къуыри æххæстгæнгæйæ, Уæрæсейы Федерацийы сенатор Виталий Назаренко бабæрæг кодта Æрæфы район. Федта Цыколайы ног спорткомплекс æмæ хистæр кары фæлтæрæн центр. Сенатор ма фембæлд Æрæфы районы сæргълæууæг Хамыхъоты Робертимæ. Æрныхас кодтой районы социалон-экономикон райрæзтыл, национ программæтæ æмæ федералон проекттæ æххæст кæныныл. Бæлвырддæр радзурдзæн Хъайтмазты Дзерассæ.
Уæрæсейы Федерацийы сенатор Виталий Назаренкойы балц Æрæфы районмæ райдыдта пенсиисджытимæ фембæлдæй. Уыд социалон фонды хайады цур хистæр кары фæлтæрæн центры. Ам ис æппæт уавæртæ алыхуызон мадзæлттæ аразынæн: лекцитæн, дæсныйадæвдисæг ахуыртæн, фембæлдтытæн сфæлдыстадон къордтимæ æмæ волонтертимæ. Цæгат Ирыстон у, ахæм центртæ аразыны пилотон проекты архайæг. Ам сæрмагонд æргом здæхт цæуы финансон æмæ нымæцон ахуырдзинад бæрзонддæр кæнынмæ. Пенсиисджыты ахуыр кæнынц алыхуызон электрон сервистæй пайда кæныныл. Виталий Назаренко аныхас кодта цæрджытимæ æмæ фæнысан кодта центры ахадгæ куыст.
Дарддæр Виталий Назаренко бабæрæг кодта Цыколайы спортивон комплекс. Сарæзтой йæ «Хъæуты территориты комплексон райрæзты» паддзахадон программæ æххæстгæнгæйæ. Ам кусы 8 секцийы: уæгъдибар хъæбысхæсты, боксы, гимнастикæйы, уæззау атлетикæйы æмæ спорты хъазæн хуызтæй. Æдæппæтæй ам архайы 500 лæппу æмæ чызгæй фылдæр æппæт районтæй. Виталий Назаренко федта ног спорткомплекс æмæ аныхас кодта адæмимæ. Сенатор загъта, ам цы уавæртæ саразын бантыст, уыдон дзуапп дæттынц нырыккон стандарттæн. У иттæг хорз фæз спортæй архайынæн æмæ æнæниз цардыуаг парахат кæнынæн.
Кусæг балцы рæстæг Виталий Назаренкойæн уыд фембæлд Æрæфы районы сæргълæууæг Хамыхъоты Робертимæ. Æрныхас кодтой районы социалон-экономикон райрæзты фарстатыл, национ программæтæ æмæ федералон проекттæ æххæст кæныныл. Фарон Федерацийы Советы цы уынаффæ снысан кодтой, уый хатдзæгтæм гæсгæ Æрæфы районы хъуамæ æххæстгонд æрцæуа доны системæйы модернизаци, нацпроект «Туризм æмæ уазæгуарзондзинады индустрия»-мæ гæсгæ та хæххон хайы сæвæрдзысты модулон хæдзæрттæ. Снысан кодтой фидæнмæ пълæнттæ дæр.
Виталий Назаренкойы ныхæстæм гæсгæ, ахæм хуызы куыст ахадгæ у. Хорз фадат дæтты, риссаг фарстатæ алыг кæнын куыд ис, уый бынæтты снысан кæнынæн æмæ цæрджытимæ аныхас кæнынæн. Фæндты ис, июны фæстæмæ æрыздæхын æмæ куыст дарддæр ахæццæ кæнын.
