Бацæттæ йæ кодтой Терчы хъазахъхъæгты культурон центры хъæппæрисæй, культурæйы фонды проект «Осетия – жемчужина России» æххæст кæнгæйæ
Национ музейы байгом равдыст «Ирыстойнæгтæ – Фыццаг дунеон хæсты архайджытæ». Бацæттæ йæ кодтой Терчы хъазахъхъæгты культурон центры хъæппæрисæй, культурæйы фонды проект «Осетия – жемчужина России» æххæст кæнгæйæ. Бæлвырддæр радзурдзæн Чехойты Фатимæ.
Ирд, рухс цæсгæмттæ – ахæм уыдысты равдысты уазджыты фыццаг хъуыдытæ. Экспозици «Ирыстойнæгтæ – Фыццаг дунеон хæсты архайджытæ» байгом Национ музейы. Экспонаттимæ се ппæтæй раздæр базонгæ республикæйы Праламенты сæрдар Тускъаты Таймураз.
Равдыст бацæттæ кодтой Уæрæсейы культурæйы фонды регионалон хайады æмæ Терчы хъазахъхъæгты культурон центры кусджытæ. Йæ байгом кæныны кадджын мадзалмæ ма æрбацыдысты архивон службæйы разамонæг Хайманты Барис, республикæйы сæргълæууæджы уынаффæгæнæг Тебиаты Еленæ, журнал «Мах дуджы» сæйраг редактор Хетæгкаты Оксанæ, æхсæнадон куыстуæтты минæвæрттæ æмæ истори уарзджытæ.
Мадзалы презентаци скодтой, проект «Осетия – жемчужина России»-йы фæлгæты рухс чи федта, уыцы æмбырдгæндтæн. Уыдон сты – «Ирыстоны разамонджытæ», «Дзæуджыхъæуы разамонджытæ», конкурс «Къостамæ фыстæг»-ы лауреатты уацмысты æмбырдгонд æмæ чиныг «Терские ведомости».
Мадзалы архайджыты хъазахъхъаг поэтты сфæлдыстадимæ базонгæ кодта Архонкæйы атаман Николай Коломыц – бакасти Граждайнаг хæсты архайæг Павел Поляковы æмдзæвгæтæ.
Терчы хъазахъхъæгты культурон центры разамонæг Владимир Писаренко куыд фæбæрæг кодта, уымæ гæсгæ куыстуат байгом кодтой хъазахъхъаг культурæ æмæ традицитæ парахат кæныны æмæ кадджын фыдæлты зæрдыл дарыны тыххæй.
Фыццаг дунеон хæсты архайджыты хуызистыты равдыст фенæн ис Национ музейы. Йæ саразджытæ фидæнмæ нысан кæнынц экспозициимæ скъоладзауты зонгæ кæнын.
