Дыууæ боны Дзæуджыхъæуы цæрджытæн æмæ уазджытæн сæ бон лæвар фенæн у Фыдыбæстæйы Стыр хæсты цауты тыххæй уникалон равдыст
Цæгат Ирыстонмæ схæццæ цæугæ музей «Уæлахизы поезд». Дыууæ боны Дзæуджыхъæуы цæрджытæн æмæ уазджытæн сæ бон лæвар фенæн у Фыдыбæстæйы Стыр хæсты цауты тыххæй уникалон равдыст. Экспозици нырыккон технологиты руаджы æвдисы историон æцæгдзинад. «Уæлахизы поезд» Дзæуджыхъæуы æфсæнвæндаджы вокзалы æрбынат кодта 2 бонмæ. Бабæрæг кæнæн æй ис 10 сахатæй 19 сахатмæ. Чехойты Фатимæйæн ныхасы бар.
Æфсæнвæндаджы мингай километртæ, æмæ «Уæлахизы поезд» схæццæ Дзæуджыхъæумæ. Уникалон историон-аивадон цæугæ музейы æмбырдгонд сты Советон Цæдисы 40-æм азты тыххæй хабæрттæ.
Экспозици райдайы хæсты размæйы цæрджыты скульптурæты равдыстæй. Адæмы цæсгæмттæ нырма зынынц æдыхстæй. Экспозици саразыныл «Невский баталист»-ы командæйæ архайдтой 100 адæймагæй фылдæр 4 мæйы дæргъы. Аудиогид дзуры, хæст йæхи цæстæй чи федта, уыцы чызг Лидияйы царды хабæртты тыххæй.
Æфсæддонты хæстмæ цы поезд ласы, уый, дохтыртæ салдæтты кæм дзæбæх кæнынц, уыцы вагон, япойнаг ахуыргæндтæ, плены чи бахауд, уыдонæн цы фыдмитæ кæнынц, уый æвдисæг инстолляци … «Уæлахизы поезд» фенæн ис, 12 азæй фылдæр кæуыл цæуы, уыцы адæмæн. Кæстæртæн экспозийы иуæй-иу хæйттæ зын бамбарæн уыдзысты.
Скъоладзаутæм цымыдисдзинад сæвзæрд, Царды фæндаг кæй хуыдтой, уыцы Ладогæйы цад æвдисæг экспозици. Равдыст саразджытæ сабитæн радзырдтой Ленинградмæ алы рæттæй гæдыты кæй ластой, уый тыххæй дæр. Гæдыты руаджы тох кодтой, цы бирæ уырытæ дзы фæзынд, уыдонимæ. Æцæг цауты архайджыты тыххæй цыбырæй дзургæйæ сывæллæттæн æмбарын кодтой стыр истори.
1945 азы майы цаутæ æрбынат кодтой хицæн вагоны. Хæдзармæ фæндаг рыст æмæ намысы 1418 боны дæргъæн. Зæрдылдарын кæй хъæуы, ахæм истори. «Уæлахизы поезд» Дзæуджыхъæумæ ссыд ныр 3-аг хатт. Дарддæр йæ фæндаг дардзæн Назраньмæ.
