Зæронд хæтæлтæ ивынц ногтæй
Дарддæр цæуы Алагиры районы хæххон хайы дондзæуæнты рацарæзт. Коммуналон инфраструктурæйы рацарæзты фæрцы хæрзхъæд нуазыны дон фæзындзæн Мызуры, Садоны, Уыналы, Зынцъары, Галоны, Нузалы, Буроны æмæ Уæллаг Зджыды. Зæронд хæтæлтæ ивынц ногтæй. Уыдон лæггад кæндзысты 50 азæй фылдæр. Ныртæккæ специалисттæ аразынц ног цæттæгæнæн фæзтæ, дон сыгъдæггæнæн нырыккон станцæтæ, æмæ электрон тыхдæттæг уæлæмхасæн генератортæ
Ам куыстытæ иу минут дæр не рлæууынц. Алцыдæр уый тыххæй, цæмæй Зынцъары цæрджытæ ифтонг уой сыгъдæг нуазыны донæй. Дондзæуæн системæ лæггад кæны Советон рæстæгæй нырмæ, æмæ хызтæ рацаразын хъуыди æнæмæнг. Специалисттæ ныридæгæн равæрдтой 1300 метры дондзæуæн хæтæлтæ.
Зæронд доны хæтæлтæ раивдзысты пластмассæй конд нырыккон фæрæзтæй. Кусæн æрмæг иууылдæр уæрæсейаг продукци. Специалисттæ куыд зæгъынц, афтæмæй ахæм хъуыдымæ хуымæтæджы не рцыдысты.
Кæронмæ фæхæццæ кæнынц, Холсты цы куыстытæ цæуынц, уыдон дæр. Уым дæр фæвæййынц хæтæлтæ ивд, тагъд райдайдзысты донцæттæгæнæн станцæтæ аразын. Хæхты зын кусæн кæй у, ууыл дзурын дæр нæ хъæуы. Нæй дзы фæндæгтæ æмæ æндæр хъæугæ инфраструктурæ, машинæтæн дзы у зын ссæуæн. Уыцы зындзинæдты сæрты ахизæн дæр ис, фæлæ æрдзы хивæнд митимæ та тохгæнæн нæй. Уымæ гæсгæ фæстиат кæнынц куыстытæ дæр.
Æдæппæтæй уыдзæн 7 ноггонд станцæйы. Алчидæр дзы лæггад кæндзæн цалдæр хъæуæн. Дондзæуæн хызтæ уыцы иу рæстæг ивынц Алагиры районы 6 хъæуы. Уый, Уæллаг Зджыды, Садоны, Галоны, Буроны, Уыналы æмæ Зынцъары. Йæ радмæ æнхъæлмæ кæсы Мызур дæр. Зæгъын хъæуы уый, æмæ ныхас æрмæст дондзæуæн системæйыл нæ цæуы, фæлæ зынгсирвæзтыты ныхмæ системæйыл дæр. Кусджытæ сæвæрдзысты гидранттимæ цъайтæ. Уымæй уæлдай, алы объекты дæр донцæттæгæнæн фæзтæ резервуартимæ, æппæт хъæугæ инфраструктурæимæ генератортæ. Фæзындзæн дзы сыгъдæггæнæн системæ дæр. Æппæт участоктæм та сæ цæст дардзæн Алагиры
Пъланмæ гæсгæ, Алагиры хæххон хъæуты дондзæуæнты рацарæзт кæронмæ фæуыдзæн афæдзы кæрон. Куыстытæ цæуынц паддзахадон программæ «Цæгат Кавказы федералон зылды райрæзт»-ы фæлгæты.
