Аивадуарзджыты размæ рахæсдзæн йæ бирæ азты сфæлдысады хатдзæгт
Абон Цæгат Ирыстоны паддзахадон университеты концертон залы уыдзæн Уæрæсейы аивæдты сгуыхт архайæг, актер æмæ кинорежиссер Сæлбиты Акимы сфæлдыстадон изæр. Аивадуарзджыты размæ рахæсдзæн йæ бирæ азты сфæлдысады хатдзæгтæ. Сæлбиты Аким каст фæци нæ бæстæйы киноаивады паддзахадон институты Сергей Герасимовы æмæ Тамара Макаровайы актеры æмæ режиссеры курс. Адæм ын уарзынц йæ зарджытæ дæр. Курдитаджын адæймаджы цардыл афæлгæст Чехойты Фатимæ.
Бирæ азтæ культурæйæн снывонд кæнын, дæсгай ист кинонывтæ æмæ сæдæгай историтæ. Историтæ, дунейыл йæ ном кæмæн айхъуыст, уыдоны тыххæй. Цыма сæ хабæрттæ иууылдæр зындгонд сты, фæлæ сын Сæлбиты Аким ссары сæ ног миниуджытæ.
Йемæ ныхас кæнгæйæ, сæ миддуне раргом вæййы ног хуызы. Сæлбиты Аким аивадуарзджытæн балæвар кодта се*ппæтæй ирддæр, ныфсджындæр æмæ йæ цард цымыдисаг кæмæн у, ахæм 200 -йæ фылдæр адæмы тыххæй равдыстытæ. Уый хуымæтæг куыстæй уæлдæр у – хорз фадат мысинæгтæ зæрдылдарынæн. Æдзух зæрдæмæ хæстæг чи уыд, уыдоны тыххæй.
Бирæ азты Советон Цæдисы æмæ Уæрæсейы кинорежиссер концерттæ нæ арæзта. Ныр йе сфæлдыстадон изæртæ раздæхтысты йæхи æмæ сæм тынг чи *нхъæлмæ каст, уыцы адæмы цардмæ. Уыдонæн сæ фыццаг ацæудзæн майрæмбоны. Уæрæсейы аивæдты сгуыхт архайæг адæмы размæ рахæсдзæн йе сфæлдыстадон хæзнатæ.
Кинематограф ын æдзухдæр уыди ахсджиаг. Скъолайы фæстæ, йе *мкъласонтæ уæлдæр ахуыргæнæндæтты зонындзинæдтæ куы истой æмæ царды сæ бынат куы агуырдтой, уæд уыцы рæстæг Сæлбиты Аким та райдыдта кинонывтæ исын. Уæд сæххæст йе стыр бæллиц – сси кинойы аивады егъау дунейы хай.
Режиссер хъуамæ зона адæмы сразæнгард кæнын ног хъуыдыйыл, сæххæстгæнæн кæмæн нæй, ахæм куы уа, уæддæр. Æнцон хæс кæд нæу, зæгъы Сæлбиты Аким, уæддæр равзæрст фæндагыл æнæ къуылымпыйæ цæуын хъæуы кæронмæ.
