Уырнæг адæмæн фадат ис, стыр хæзна – Сыгъдæг Георгий Уæлæхизхæссæджы буары чысыл хаймæ бандзæвынæн
Спорты галуан «Манеж»-ы байгом равдыст «Чырыстон Ир». Уырнæг адæмæн фадат ис, стыр хæзна – Сыгъдæг Георгий Уæлæхизхæссæджы буары чысыл хаймæ бандзæвынæн. Армукъайы равæрдтой аргъуаны атрибуттæ, дины литературæ, Дзуæртты нывтæ, æрмдæсныты æмæ моладзандонты æрмадзты конд дзауматæ. Равдыст бабæрæг кодта не сфæлдыстадон къорд. Ныхасы бар Чехойты Фатимæйæн.
Традицион армукъа-равдыст «Чырыстон Ир» байгом куывдæй. Дзæуджыхъæуккаг æмæ Алайнаг алчыр Герасимимæ дзы архайдта Калугæйы æмæ Боровскы митрополит Климент. Армукъа байгом кæныны кадджын мадзалы адæмы размæ рахастой Калугæйы епархийæ ласт Сыгъдæг Георгий Уæлæхизхæссæджы буары чысыл хай.
Аргъуаны дзуаматæ, дины литературæ, Дзуæртты нывтæ. Ам балхæнæн ис моладзандонты æрмдæсныты куыстытæ, уырнæг адæмы уæлæдарæс, сызгъæрин æмæ взистæй конд аивгæнæнтæ. Фермер Сергей Брадов Иркутскæй Ирыстонмæ сласта йæ райгуырæн зæххы хай. Нæлгоймаг лыстæг гæн, сау тмин, кунжут æмæ нæзыйæ аразы зетийы хуызтæ. Æххæст сты адæймаджы æнæниздзинадæн ахъазаг миниуджытæй. Æнусты дæргъы зети кæныныл хæст уыдысты фермеры фыдæлтæ. Сæ дæсныйад лæвæрдтой иу фæлтæрæй иннæмæ.
Азæй азмæ армукъа апарахат вæййы фылдæрæй фылдæр уырнæг адæмыл. Ацы аз йæ архайджытæ æрмæст не *мбæстонтæ не сты. Республикæмæ ссыдысты чырыстон диныл хæст адæм Сирийæ, Сербийæ, Черногорийæ æмæ Гуырдзыйæ. Арсений Агабекян æрласта гуырдзиаг моладзандонты, æрмадзты æмæ æрмдæсныты куыстытæ.
Армукъа алы аз дæр æрмæст регионты моладзандонты куыстытæ балхæнынæн арæзт не *рцæуы – йæхирдыгонау у хорз фадат аргъуантыл æрзилынæн, иннæ адæмты Дзуæрттимæ базонгæ уæвынæн.
Равдысты фæлгæты фæнд кæнынц рухстауæн æмæ культурон мадзæлттæ саразын сауджынтимæ, фысджытимæ æмæ ахуыргæндтимæ. Армукъайы хæзнатæ Спорты галуан «Манеж»-ы фенæн уыдзæн 6 апрелмæ.
