Видеороликты конкурс саразыныл бакуыста республикæйы ахуырады æмæ наукæйы министрад
«Уарзын мæ район». Ахæм сæргондимæ конкурсы хатдзæгтæ скодтой Цæгат Ирыстонæн æхсæнадон æххуысы штабы. Видеороликты конкурс саразыныл бакуыста республикæйы ахуырады æмæ наукæйы министрад. Сфæлдыстадон ерыс баиу кодта æппæт районты скъоладзауты. Сæ зонындзинæдтæ раргом кодтой 7-11-æм кълæсты ахуырдзаутæ. Жюрийы размæ рахастой 28 куысты. Роликты хуыздæр авторты бæрæг кодтой дыууæ номинацийы — районы зæрдылдарæн æмæ историон бынæттæ, стæй районы хъайтартæ. Лæппутæн æмæ чызджытæн арфæтæ ракодтой ахуырады æмæ наукæйы министры хæдивæг Габеты Вадим, Уæрæсейы хъæбатыр Абайты Юрий æмæ æфсæддон дохтыр, «Ныфсхастдзинады» майданы хицау Мария Мирошниченко. Конкурсы уæлахиздзаутæ систы Дзæуджыхъæуы 15-æм скъолайы ахуырдзау Костанты Артур, стæй 11-æм скъолайы минæвар Елойты Камиллæ.
