Ацыд хъазт «Что? Где? Когда?»-йы хуызы
9-æм майы агъоммæ интеллектуалон клуб «Альбус» сарæзта традицион турнир «Это наша Победа!». Ацыд хъазт «Что? Где? Когда?»-йы хуызы. Фыдыбæстæйы Стыр хæсты азты историон цаутæ хорз чи зоны, ахæм адæм уыдысты йæ архайджытæ. Æдæппæтæй 28 командæйы. Уыдон арæзт æрцыдысты бæрнон кусджытæй, республикæйы районты, мыггæгты минæвæрттæй, студенттæй æмæ скъоладзаутæй. Хъазтæн йæ алы цыппар раунды дæр уыдис 7 фарсты. Алкæцыйæн дæр сæххæст кæнынæн лæвæрд цыд иу минут — уыцы рæстæгмæ-иу архайджытæ кæрæдзиимæ кодтой хатдзæгтæ æмæ-иу радтой дзуапп. Ацы аз проект арæзт æрцыд 10-æм хатт Республикæйы сæргълæууæг æмæ Хицауады, Ахуырады министрады, мыхуыры æмæ дзыллон коммуникациты комитеты æмæ хæдбар компаниты æххуыссæй. Йæ нысан у Фыдыбæстæйы Стыр хæсты историмæ цымыдисдзинад æвзæрын кæнын æмæ интеллектуалон хъæзтытæ парахат кæнын. Хъазты архайджытæ хорзæхгонд æрцыдысты Кубоктæй, Кады гæххæттытæй, майдантæй æмæ лæвæрттæй.
