Фыццаг вице-премьер Атарты Георгий федта куыстыты цыд
Республикæйы дарддæр цæуы, социалон нысаниуæг кæмæн ис, уыцы объектты арæзтад æмæ цалцæг. Фыццаг вице-премьер Атарты Георгий федта куыстыты цыд. Сæрмагонд къамисимæ бабæрæг кодта сывæллæтты фыццæгæм поликлиникæ, 5-æм гимназы бæстыхай æмæ Магкаты Зурабы уынджы ног скъолайы арæзтады фæз. Поликлиникæйы цалцæг нысан кæнынц ноябры фæуынмæ, 5-æм гимназ та – ахуыры азы райдианмæ. Уæлдай æргом здæхт цæуы куыстыты хæрзхъæддзинадмæ. Чехойты Фатимæ радзурдзæн бæстондæр.
Ахæм егъау куыстытæ поликлиникæйы нæ уыд куы байгом, уæдæй нырмæ. Ууыл та рацыд æнусы *рдæгæй фылдæр. Уымæ гæсгæ йын бындурон цалцæг æнæ скæнгæ нал уыд. Куыстытæм бавнæлдтой ацы аз. Ныридæгæн дæр дзы чысыл нæ бантыст. Цæмæй медицинон лæггæдтæ æнæ къуылымпыйæ æххæст цæуой, уый тыххæй цалцæг цæуы къæпхæнгай.
Цалцæггæнæн куыстытæ сæ тæмæны бацыдысты 5-æм гимназы райдиан скъолайы дæр. Цалдæр уæладзыджы ма баззад лыстæг кæнинæгтæ. Æппæт куыстытæ фæуынвæнд кæнынц 1-æм сентябрмæ.
Фыццаг вице-премьер Атарты Георгий æркаст куыстыты цыдмæ æмæ сæ хæрзхъæддзинадмæ ног скъолайы Магкаты Зурабы уынджы. Бæстыхай дзуапп дæтты нырыккон домæнтæн. Скъолайы ахуыр кæндзысты 550 сывæллоны. Хъæндзинæдтæ ис алы объекты дæр, куыст цæуы сæ аиуварс кæныныл, загъта республикæйы Хицауады сæрдары хæдивæг.
Атарты Георгий специалистты раз сæвæрдта хæс – бæрæггонд хъæндзинæдтæ цыбыр æмгъуыдмæ аиуварс кæнын. Цæмæй цæрджытæн фадат уа тагъд рæстæг социалон объектты уавæртæн аккаг аргъ скæнынæн.
