Ахæм статус хъуамæ лæвæрд æрцæуа Нары хъæуæн дæр
Хилакы гуырæнбынат хъуамæ суа сæрмагонд æгъдауæй хъахъхъæд чи уыдзæн, ахæм æрдзон территори. Ахæм статус хъуамæ лæвæрд æрцæуа Нары хъæуæн дæр. Ахæм хæслæвæрд Цæгат Ирыстоны сæргълæууæг Сергей Меняйло радта æрвылкъуырион аппаратон æмбырды. Ныхас цыд оперативон уавæрыл дæр. Хицауады сæрдары хæдивæг Томайты Ирбег куыд фехъусын кодта, афтæмæй республикæйы 6 районы 46 хъæуы архайы зынгсирвæзтыты ныхмæ сæрмагонд фæтк. Мидхъуыддæгты министрады информацимæ гæсгæ, къуыримæ нысангонд æрцыд 161 фыдракæнды. Уыдонæй 36 æххæстгонд уыдысты информацион-коммуникацион технологитæй пайдагæнгæйæ. Дзырдтой ма донпырхгæнæн фæзтæ бæрæг кæныны æмæ нымайæнтæ æвæрыны тыххæй. Профилон министрады информацимæ гæсгæ, специалисттæ ныридæгæн сæвæрдтой 700 приборæй фылдæр. Куыстытæ фæнд кæнынц ацы азы кæронмæ фæуын.
