Æдæппæтæй муниципалон программæмæ гæсгæ ацы аз снысан кодтой Дзæуджыхъæуы 29 уаццаджы сцалцæг кæнын
Дзæуджыхъæуы 45 азмæ фыццаг хатт цæуы Любовь Шевцовайы уынджы бындурон цалцæг. Куыстытæ райдыдтой Краснодонскийы уынгæй Гугкайы-фырты уынджы онг 350 метры уаццаджы. Подрядон организацийы минæвæрттæ куыд зæгъынц, афтæмæй хынцынц бынæттон цæрджыты хъуыдытæ. Æдæппæтæй муниципалон программæмæ гæсгæ ацы аз снысан кодтой Дзæуджыхъæуы 29 уаццаджы сцалцæг кæнын. Чехойты Фатимæ радзурдзæн бæстондæр.
Любовь Шевцовайы уынджы бирæ азты асфальт кæй нæ уыд, уый тыхсын кодта куыд шофырты æмæ фистæгæйцæуджыты, афтæ бынæттон цæрджыты дæр. Хус бонты – рыг, къæвдаты рæстæг та – цъыф. Фæндаджы рацарæзт адæмæн рагæй уыд сæ бæллиц.
Горæты уынгты бындурон цалцæджы муниципалон программæмæ гæсгæ специалисттæ майы бавнæлдтой фæндаджы уæлцъар сног кæнынмæ. Ныридæгæн 300 метры дæргъæн уаццаджы сæйраг куыстытæ фесты.
Ног бордюртæ, фидаргонд люктæ, раст уæлвæзад. Подрядон куыстуаты минæвæрттæ цалцæджы рæстæг хынцтой цæрджыты курдиæттæ.
Муниципалон программæйы фæлгæты ацы аз нысан кæнынц Дзæуджыхъæуы 29 фæндаджы уаццаджы сцалцæг кæнын. Куыстытæ цæуынц Бородинскийы, Галковскийы, Горькийы, Алагирскийы уынгты. Дзæуджыхъæуы фæндæгты реконструкци дарддæр æххæстгонд цæуы.
