Уыдысты дзы лекцитæ, музыкалон мадзал, цымыдисаг экскурситæ
Мамысоны курорты арæзт æрцыд арт-фестиваль. Уыдысты дзы лекцитæ, музыкалон мадзал, цымыдисаг экскурситæ. Уымæй дарддæр ма æппæт архайджытæн фадат уыд сæ къухфыст ныууадзынæн. Кæронбæттæны та ацыд егъау музыкалон равдыст. Фестивалы тыххæй бæстондæр радзурдзæн Чехойты Фатимæ.
Иу ныв – иумæйаг куыст, кæцы суыдзæн удæгас арт-объект. Хатдзæг ахсджиаг нæу, сæйрагдæр у æмархайд. Ахорæнтæ, æнкъарæнтæ æмæ цæттæдзинад хи фæд ныууадзынмæ. Дæсныйадæвдисæг ахуыр «Бесцветный» ацыд Мамысоны арт-фестивалы. Сарæзта йæ нывгæнæг Апаты Азæмæт.
Сфæлдыстадон адæймаг йæ уды æнкъарæнтæ алы хуызты равдисы. Нывгæнджытæ – ахорæнты руаджы, музыканттæ – зарæджы. Уымæн æвдисæн – «Дыхание». Уый баиу кодта Берозты Тамуйы ирон къорд «Рагон бал» æмæ нывгæнæг Александр Лестюхины. Традицион æмæ электрон музыкæйы иудзинадæй авторты фæндыд равдисын, фæлтæрты бастдзинад.
Арт-фестивалы фæлгæты арæзт æрцыд хойраджы, бынæттон керамикæйы, аивгæнæты æмæ дарæсы армукъа. Уазджытæ архайдтой ахуырадон лекциты, тезгъо кодтой цымыдисаг экологон къахвæндæгтыл. Лисрийы рагон мæсгуыты астæу ацыд фестивалы музыкалон хай. Мадзал сарæзта – акционерон æхсæнад «Кавказ РФ» республикæйы Хицауады æххуысæй. Йæ сæйраг хæс уыд – рагон комы истори раргом кæнын æмæ нырыккон аивады уæлвæзадыл ног курорты хъомыс равдисын.
Арт-фестиваль у Цæгат Ирыстоны ног курорты рæзты хорз райдиан. Цымыдисаг мадзал адæмæн балæвар кодта, ферох кæнæн кæмæн нæй, ахæм хорз æнкъарæнтæ.
