Арæзт æрцыд æфсæддон намысы горæт – Дзæуджыхъæуы
Цæгат Ирыстоны сæргълæууæг Сергей Меняйло раарфæ кодта æфсæддон намысы горæтты Цæдисы XVII-æм Съезды делегаттæн. Арæзт æрцыд æфсæддон намысы горæт – Дзæуджыхъæуы. Нæ горæтмæ ссыдысты Уæрæсейы алы регионты минæвæрттæ. Æдæппæтæй сты 36 делегацийы. Нæ республикæйы Сæргълæууæг куыд загъта, афтæмæй хъæбатыры горæты ном чи хæссы, уый хъахъхъæны нæ бæстæйы историйы ирд сыфтæ, стæй нæ адæмы сгуыхтдзинæдтæ. Ацы аз нæ бæстæ бæрæг кæны Фыдыбæстæйы Стыр хæсты Уæлахизы 80 азы бон. Уый у нæ иугæнæг истори, æмæ нæ сæйраг хæс у уыцы хъæздыг истори фидæны фæлтæртæм хæццæ кæнын. Уæлдайдæр та ныртæккæ дæр цæуы стыр патриотон куыст, нæ лæппутæ хъæбатырæй æххæст кæнынц се фсæддон хæс сæрмагонд æфсæддон операцийы зонæйы. Уыимæ сæ адæмы хатт æмæ дин нæ хынцгæйæ. Иумæ тох кæнынц, нæ фыдæлтæ цæимæ тох кодтой, уыцы зианхæссæг фашизмы ныхмæ. Æфсæддон намысы горæтты Цæдисы сæрдар Анатолий Зотов загъта бузныджы ныхæстæ Цæгат Ирыстоны разамындæн æмæ Дзæуджыхъæуы администрацийæн, ахæм хъæрмуд фембæлд кæй рауад, уый тыххæй. Бынæттон администрацийы сæргълæууæг Милдзыхты Вячеслав йæ раныхасы куыд загъта, афтæмæй абон Дзæуджыхъæуы цæры Фыдыбæстæйы Стыр хæсты 12 ветераны. Уыдонæй 4 архайдтой ацы съезды. Æфсæддон намысы горæтты Цæдис арæзт æрцыд 2013-æм азы, Уæрæсейы организацион комитет «Уæлахиз»-ы уынаффæмæ гæсгæ. Организаци баиу кодта 47 горæты нæ бæстæйы 30 субъектæй. Дзæуджыхъæу хæстон намысы горæты ном хæссы 2007-æм азæй фæстæмæ.
