Архайдтой дзы 6 фæсивæдон командæйы Цæгат Ирыстонæй æмæ Цæцæны Республикæйæ
Цыколайы арæзт æрцыд, республикæйы Парламенты призтæ рамбулыны турнир футболæй. Архайдтой дзы 6 фæсивæдон командæйы Цæгат Ирыстонæй æмæ Цæцæны Республикæйæ. Турнир баст уыд Фыдыбæстæйы Стыр хæсты Уæлахизы 80 азы бонимæ. Академи «Алани»-йы æвзонг футболисттæ арвыстой сæ фыццаг матч. Уый нæ хынцгæйæ, тырныдтой уæлахизмæ, – загъта командæйы дуаргæс Боцуаты Давид. Футболæй архайы ныр 7 азы. Ныридæгæн архайдта цалдæр егъау турниры Уæрæсейы алы горæтты. Давид куыд загъта, афтæмæй йын ахсджиаг у кæддæриддæр хорз спортивон цæттæдзинад æвдисын. Республикæйы Парламенты призтæ рамбулыны турнир райдыдта традицион куывдæй. Лæппутæн арфæтæ ракодтой Парламенты спикер Тускъаты Таймураз æмæ Æрæфы районы администрацийы сæргълæууæг Хамыхъоты Роберт. Æвзонг футболисттæн сæ зæрдæ загъта æргом хъазт æмæ уæлахизыл æцæг ерыс. Турнир цыди сæрмагонд системæмæ гæсгæ. Сæйраг тæрхонгæнæг Бутаты Вадим куыд радзырдта, афтæмæй турниры уыди бæрзонд ерысхъомдзинад. Уæлахиздзаутæн æмæ призертæн радтой кубоктæ æмæ кады гæххæттытæ. Йæхи хуыздæр чи равдыста, уыцы спортсментæн ма радтой хицæн призтæ.
