Уый у нывкæнынады аивады музейы Цæгат Кавказы филиалы æмæ мæскуыйаг культурон тыгъдады иумæйаг проект
Адæмон традициты æмæ культурæйы бынæттæй схонæн ис, Дзæуджыхъæуы алы цæрæн кæрты дæр чи ис, ахæм хæдзæрттæ. Нырæй фæстæмæ сын фæзынд ног мидис. Æртæ хæдзары кæрты æххæст кæнынц программæ «Культурæйы кæрт». Уый у нывкæнынады аивады музейы Цæгат Кавказы филиалы æмæ мæскуыйаг культурон тыгъдады иумæйаг проект. Йæ нысан у – алывæрсыг сфæлдыстад раргом кæнынæн фадат раттын. Бынæттон цæрджытæ нывгæнджытимæ æмæ режиссертимæ архайдтой сфæлдыстадон лабораториты. Бæстондæр радзурдзæн Чехойты Фатимæ.
Театралон равдыст Дзæуджыхъæуы кæртытæй иуы. Сценæйы бæсты – хæдзар, актертæ та – Курсантов-Кировцевы уынджы цæрджытæ. Постановкæ сæвæрдтой сæхи сценаримæ гæсгæ, сæ царды фæлтæрддзинад æмæ традициты бындурыл. Профессионалон ахуырад ис æрмæст спектаклы режиссермæ. Фæлæ Бесолты Каринæйы ныхæстæм гæсгæ йæ размæ цы хæс æвæрд уыд, уый уыд чысыл. Хъуыдис æй адæмы хъуыдытæ хынцын æмæ амонын, хуыздæр сæ куыд равдисæн ис, уый.
Социалон спектаклы архайын ногдзинад у кæрты цæрджытæн. Уæвгæ, хъазгæ æппындæр нæ кодтой. Хæдзар сæ иу кæны æрвылбоны царды дæр. Ам иумæ фаархайынц бæрæгбæтты рæстæг, фæныхас кæнынц, сæ фæллад фæуадзынц. Хæдзар аразгæ дæр сæхæдæг скодтой. Постановкæйы архайынц цæрджытæ стырæй чысылæй.
Дзусты Ибрагимы номыл уынджы хæдзар сси кинонывы декораци. Рауад дзы киноисæн фæз. Ам Андрей Сильвестровы æрмадзы архайджытæ систой цалдæр цыбыр нывы. Рольтыл бакуыстой цæрджытæ. Равдыстой цымыдисаг цаутæ сæхи цардæй, сæ зæрдæты æнкъарæнтæ æмæ хъуыдытæ. Монтаж кæронмæ нæма фæци. Фенын дзы кодтой чысыл скъуыддзаг. Коцойты Арсены æмæ Плиты Иссæйы номыл уынгты тигъыл цы кæрт ис, уый хæдзарæй та рауад музей. Экспонаттæ равзæрстой цæрджыты портреттæ. Бакуыста сыл нывгæнæг Юлия Картошкина. Фенæн ма дзы ис хæдзары дзаумæттæ, аивгæнæнтæ æмæ бирæ æндæр цымыдисаг экспонаттæ.
Хæдзарттæн ахæм æнахуыр хуыз райсын бантыст проект «Культурæйы кæрт» æххæстгæнгæйæ. Хъæппæрис разынд нывкæнынады аивады паддзахадон музейы Цæгат Кавказы филиалы кусджытæм. Йе *ххуысы хай йæм бахаста Мæскуыйаг культурон центр «ГЭС-2». Йæ сæххæст кæнынæн æвзæрст æрцыдысты Дзæуджыхъæуы 3 кæрты, активон архайджытæ та уыдысты сæ цæрджытæ.
Иу къуыри – цæттæгæнæн рæстæг, æмæ проект саразджытæ æмæ архайджытæ дисы бафтыдысты. Бирæтæ фæбæрæг кодтой, цæрджытæ проектмæ бæрнон цæстæй кæй ракастысты, уый. Æмæ ныр Дзæуджыхъæуы фæзынд Хæдзар-театр, Хæдзар-музей æмæ Хæдзар-кинотеатр.
Проект рауад æнтыстджын. Уымæ гæсгæ, хъуамæ Культурон кæртытæ фæфылдæр уой. Программæ дарддæр æххæстгонд цæудзæн – æвæрд ын æрцыд фидар бындур. Уымæн æмæ алы адæймаг дæр йæ кæрты цæрджыты нымайы æппæты курдиатджындæртыл.
