Программæйы сесситæ, равдыст, документалон кинонывтæ
Дзæуджыхъæуы райдыдта фестиваль «Кавказ суæгъд кæныны тох: историйы сыфтæ». Программæйы сесситæ, равдыст, документалон кинонывтæ. Фестиваль цæуы наукон библиотекæйы, историон-патриотон проект «Уæлахизы Марафон»-ы фæлгæты. Арæзт у сывæллæтты æмæ фæсивæды æхсæнадон змæлд «Фыццæгты змæлд»-ы грантты конкурсы æххуысæй. Æртæ боны фестивалы программæйы Фыдыбæстæйы Стыр хæсты рæстæг Цæгат Ирыстоны хъæбатырдзинæдтæн ирд æвдисæн равдыст, экспертты, историкты æмæ æхсæнады минæвæртты архайдимæ тематикон сесситæ. Сæйраг темæтæ Кавказыл тохы стратегион нысаниуæг, сабыр цæрæг адæмы ныхмæ нацистты фыдракæндтæ, фæсивæды патриотон хъомылад æмæ уæлахизмæ культурæ цы вæрæн бахаста, уый. Фестиваль байгом кæныны мадзалы уыди бирæ æрыгон адæм, æмæ уый хуымæтæджы нæу. Фæсивæды размæ вæрд ис Цæгат Ирыстоны хъæбатырдзинады истори фидæны фæлтæртæм радтыны хæс. Ацы мадзалы ахадындзинады тыххæй йæ хъуыдытæ загъта проект «Навигаторы детства»-йы регионалон координатор Рубайты Лианæ. Фестиваль фæуыдзæн 10-æм октябры «Кавказ суæгъд кæныны тох»-ы документалон кинонывы равдыстæй.
