Сфæлдыстадон проект «Æрыгондзинад æнæ арæнтæй» æххæстгæнгæйæ, равдыст саразыныл бакуыста Уæрæсейы фольклорон цæдисы цæгатирыстойнаг хайад, Уæрæсейы культурæйы министрады æххуысæй
Цхинвалы, Хуссар Ирыстоны нывгæнджыты Цæдисы байгом æрыгон нывгæнджыты равдыст «Нартиадæ». Сфæлдыстадон проект «Æрыгондзинад æнæ арæнтæй» æххæстгæнгæйæ, равдыст саразыныл бакуыста Уæрæсейы фольклорон цæдисы цæгатирыстойнаг хайад, Уæрæсейы культурæйы министрады æххуысæй. Экспозицимæ хаст æрцыдысты Æрыдоны сывæллæтты аивæдты скъолайы ахуырдзауты куыстытæ. Ахуыргæнæндонæн бындур æвæрд æрцыд 50 азы размæ. Уыцы мгъуыдмæ сси фидар культурон æмæ ахуырадон центр. Йæ рауагъдонтæй бирæтæ систы зындгонд нывгæнджытæ æмæ музыканттæ. Сæ ном айхъуыст куыд нæ республикæйы, афтæ æндæр регионты дæр. Аивæдты скъолайы рауагъдонтæ активонæй архайынц алыхуызон фестивальты æмæ культурон мадзæлтты. Уыимæ свæййынц уæлахиздзаутæ æмæ лауреаттæ. Проект «Æрыгондзинад æнæ арæнтæй» æххæст кæнгæйæ, æвзонг курдиæттæ, зæгъæн ис, æмæ бацæттæ кодтой, абарæн кæмæн нæй, ахæм равдыст. Баст у Нарты кадджытимæ. Куыстытæ конд сты алы жанрты æмæ стильты. Фенæн дзы ис кадджыты хъайтарты, скифаг æмæ алайнаг æфсæддонты, традицион кæфтытæ, хойрæгтæ, хæххон пейзажтæ æмæ натюрморттæ. Равдыст ахæсдзæн 10-æм ноябрьмæ.
