Премьерæ арæзт æрцыд Вахтанговы Хæдзары
Спектакль «Гæды лæг, кæнæ нæ пъырыстъыф сæрра» бацæттæ кодтой Цæгат Ирыстоны паддзахадон университеты аивæдты факультеты студенттæ. Премьерæ арæзт æрцыд Вахтанговы Хæдзары. Ирон æвзагыл фыст комеди дзурæг у бæрнон кусджыты хивæнд митыл. Сюжетмæ гæсгæ, мæгуыр хохаг лæг ссардта æхца, хъæуккаг пъырыстъыф та сæ архайы расайыныл. Сæйраг хъайтарæн бантысдзæн бæрнон кусæджы мæнгардзинадыл фæуæлахиз уæвын, æви нæ, уый аивадуарзджытæ базондзысты постановкæйы кæронбæттæн. Спектакль æвæрд æрцыд фыццаг ирыстойнаг сылгоймаг фыссæг Кочысаты Розæйы пьесæйы мотивтæм гæсгæ. Хæдбындур национ комеди юморимæ æмæ арф хъуыдыимæ се ппæты зæрдæмæ дæр фæндаг ссардта. Рольтæ сæхиуыл сбарстой Цæгат Ирыстоны паддзахадон университеты аивæдты факультеты 4-æм курсы студенттæ. Уый уыд сæ дипломон куыст. Бирæтæн ацы премьерæ сси фыццаг стыр проект профессионалон сценæйы. Сæ разамонæг, спектаклы режиссер-æвæрæг у театралон аивады кафедрæйы доцент Цæгæраты Руслан.
