Уымæн æмæ йæ нымайынц æппæтæй уарзонæр æмæ кадджындæр национ бæрæгбоныл
Джеоргуыбамæ ирон адæм фенхъæлмæ кæсынц афæдзы дæргъы. Уымæн æмæ йæ нымайынц æппæтæй уарзонæр æмæ кадджындæр национ бæрæгбоныл. Æгъдаумæ гæсгæ адæм сæ хæдзæртты скувынц æртыгай кæрдзынтæ, фæкувынц Стыр хуыцаумæ, æмæ дзы фæкурынц сабырдзинад, æнæниздзинад, фарн æмæ амонд. Бæрæгбоны тыххæй бæлвырддæр радзурдзæн Чехойты Фатимæ.
Райсомæй раджы банкъарæн ис бæрæгбоны улæфт. Хъуысы сывæллæты худын, зæрдæрухс сты хистæртæ. Алчидæр зоны, цы хæс ыл æвæрд ис, уый. Нæлгоймæгтæ стыр аджы фыцынц дзидза, лæппутæ æппарынц сугтæ, æххуыс кæнынц бæрæгбоны фынг æрæвæрынмæ. Се *хсæн – Дзанæгаты Арсæмæг. Бæрæгбоны тыххæй йын йæ сабибонтæй фæстæмæ дзырдта йæ фыд Сослан. Ацы бон ын ахсджиаг у, уымæн æмæ дарддæр хæццæ кæны, хæдзары фæлтæрæй фæлтæрмæ цы æгъдау лæвæрд цæуы, уый.
Джеоргуыба у ирон адæмы кадджындæр бæрæгбон. Ирыхъæуы йæм рагацау райдыдтой цæттæ кæнын. Цалдæр мæйы хастой нывонд гал. Аргæвстой йæ хуыцаубоны. Алы архайды дæр – фыдæлтæн цыт, арфæтæ ивгъуыд азæн, фидæнмæ нысантæ. Ахсджиаг у фæлтæрты бастдзинад. Хистæртæ амонынц æрыгæттæн бæрæгбоны хицæндзинæдтæ, йæ хъуыды.
Ирыхъæуы традицимæ гæсгæ Джеоргуыба скæнынц алы хæдзары дæр. Рагацау æм бацæттæ кæнынц. Бинонты хистæр фынджы уæлхъус скувы. Изæрмæ фæхъуысынц нæлгоймæгты арфæтæ.
Бæрæгбоны къуырийы адæм арвитынц сыгъдæг хъуыдытимæ. Джеоргуыба у куывдты рæстæг. Алы хæдзары хистæр дæр фæкуры æнæниздзинад, фарн æмæ амонд йæ бинонтæн, стæй, кæй зæгъын æй хъæуы, æппæты стырдæр хорзæх – сабырдзинад.
