Нæ фæсивæд хуыздæртæ систы 24 командæйы хсæн, нæ бæстæйы 22 регионæй
Дзæуджыхъæуы паддзахадон бирæвæрсыг техникумы командæ æнтыстджынæй йæхи равдыста Уæрæсейы чемпионаты футболæй, астæуккаг сæрмагонд ахуыргæнæндæтты командæты хсæн. Турнир арæзт æрцыд Ессентукийы. Нæ фæсивæд хуыздæртæ систы 24 командæйы хсæн, нæ бæстæйы 22 регионæй. Дыууæ спортсмены ма схорзæхджын кодтой сæрмагонд хæрзиуджытæй. Хъайтмазты Дзерассæ радзурдзæн бæстондæр.
Ивгъуыд ерыстæй цыбыр рæстæг рацыд, фæлæ Дзæуджыхъæуы паддзахадон бирæвæрсыг техникумы командæ та фæллад уадзыныл хъуыды дæр нæ кæны. Тренировкæтæ цæуынц фæткмæ гæсгæ. Æрдæгхъахъхъæнæг Къæбысты Тамерлан райста «Турниры хуыздæр футболисты» хæрзиуæг. Ацы спортæй архайы 15 азы онг. Мини-футбол ын ног хуыз у, фæлæ йæ уый нæ бахъыгдардта йæ командæйы уæнгтимæ астæуккаг ахуыргæнæндæтты *хсæн Уæрæсейы чемпионат рамбулын.
Тренер Дзгойты Сергейы хъуыдымæ гæсгæ, сæрмагондæй командæйы рæвдз хъазты фæрцы бантыст республикæмæ сыгъзæрин хæрзиуæг сласын. Фæлæ ма уыимæ лæппутæ равдыстой сæхи хуыздæр миниуджытæ дæр. Турниры хуыздæр хъахъхъæнæджы хæрзиуæг саккаг кодтой Туаты Давидæн. Куыд зæгъы, афтæмæй йын уый æхсызгон уыд, фæлæ йын уæддæр сæйрагдæр у командæйы хатдзæг.
Æдæппæтæй ерысты архайдта 24 командæйы Уæрæсейы 22 регионæй. Турнир уыд Ессентукийы 5-æмæй 8-æм ноябры онг. Финалон матчы 14-æм минутыл Къæбысты Тамерлан пенальтийæ цы гол бакъуырдта, уый руаджы командæ бацахста фыццаг бынат. Уæрæсейы чемпионаты Дзæуджыхъæуы бирæвæрсыг техникумы командæ цы трофей рамбылдта, уый астæуккаг ахуыргæнæндоны футболон историйы сси бæрзонддæр хæрзиуæг.
Мини-футболæй æппæтуæрæсеон ерыстæ студентты хсæн «Общероссийский дивизион. Ссузы» баст уыд Стыр Уæлахизы 80 азимæ. Ерыстæ сарæзта Национ студентон футболон Лигæ Уæрæсейы футболон цæдисимæ, стæй бæстæйы спорты министрады æххуысæй. Дзæуджыхъæуы бирæвæрсыг техникумы командæйæн уыдысты ацы аз фæстаг ерыстæ. Ныртæккæ та сæм æнхъæлмæ кæсы ахадгæ тренировкæгæнæн процесс.
