Ахæм зын хæс сæ размæ сæвæрдтой, зындгонд балеринæйы кадæн спектакль бацæттæ кæнын чи сфæнд кодта, уыдон
Сценæйы Майя Плисецкæйы сурæт саразын. Ахæм зын хæс сæ размæ сæвæрдтой, зындгонд балеринæйы кадæн спектакль бацæттæ кæнын чи сфæнд кодта, уыдон. Иу актеры театры Анжелика Тер-Давидянц ныхас кæны театрдзаутимæ, примæйы миддуне æвдисгæйæ. Постановкæйы бындурæн ист æрцыдысты Майя Плисецкæйы интервьютæ, фыстæджытæ æмæ къамтæ. Бæстондæр радзурдзæн Чехойты Фатимæ.
Майя Плисецкæйы миддунейы хъæздыгдзинад, йæ ныхасы *вæрд æмæ ма суанг йæ цæстæнгас равдисын бантыст Анжеликæ Тер-Давидянцæн. Зындгонд балеринæйы дуне – аивадæй æмæ йæ дæсныйадмæ уарзондзинадæй æххæст. Хæдбардзинад æмæ бæрнондзинад сты примæйы удыконды миниуджытæ, зæгъы, балеринæйы сурæт саразыныл чи бакуыста, уыцы курдиатджын адæймаг.
Майя Плисецкæйæ у постановкæйы иунæг архайæг. Анжеликæ Тер-Давидянц ацы роль райсын йæ царды нымайы ахсджиаг цауыл.
Ахæм постановкæтæ æвæрд арæх нæ вæййынц. Моноспектакль оркестримæ. Ныхас цæуы Майя Плисецкæйы хъысмæт Родион Щедрины музыкæйы зæлтæм æмæ Жорж Бизейы «Кармен сюита»-мæ хъусгæйæ. Музыкæ ахæм ирд æмæ зæрдæмæхъаргæ у æмæ дзы ныхæстæ нал хъæуынц, зæгъы дирижер Абойты Хетæг.
Цымыдисаг пьесæ. Сфæлдыстадон къорд ыл куыста дыууæ мæйы, цæмæй йæ аивадуарзджытæн балæвар кæна балеринæйы юбилеймæ. Спектаклы фенæн ис Майя Плисецкæйы хуызистытæ, фыстæджытæ æмæ интервьютæ.
Майя Плисецкæйы сценикон сурæт разæнгард кæны бирæты. Иуæй иутæ уымæ гæсгæ сæ сæйраг дæсныйадæн равзæрстой балет, иннæтæ та йын нæ рох кæнынц йæ ном, йæ кадæн бакусынц сфæлдыстадон проекттыл.
