Алы аз дзы æххуыс райсынц сæдæгай сывæллæттæ
Дзæбæхгæнæн физкультурæ, арт-терапия, æххуысы сæрмагонд методикæтæ. Алцыдæр, цæмæй сывæллæттæ цæрой æххæст цардæй. Цæгат Ирыстоны ныр 25 азæй фылдæр кусы реабилитацион центр «Феникс». Алы аз дзы æххуыс райсынц сæдæгай сывæллæттæ. Бæлвырддæр хабæрттæ радзурдзæн Чехойты Фатимæ.
Музыкалон къорды концерт – уазджытæн. Республикæйы фæллойы æмæ социалон рæзты министр Абайты Юрий бабæрæг кодта реабилитацион центр «Феникс». Музыкæйыл ахуыр кæнын у реабилитацийы хай.
«Феникс» кусы 25 азæй фылдæр. Ам æрвылаз 600 сывæллонмæ хæстæг ацæуынц дзæбæх кæныны æмæ реабилитацийы курсытæ, райсынц дзы социалон æххуыс. Сæрды ам се *нæниздзинад фæфидар кæнынц æххуысхъуаг бинонты æмæ сæрмагонд æфсæддон операцийы архайджыты сывæллæттæ.
Дзæбæхгæнæн физкультурæ – сабитæн æмæ хистæр кары сывæллæттæн. Ам базонынц куыд ног куысты фæлтæрдтæ, афтæ сæ зæрæдыл æрлæууын кæнынц рагæй сын зонгæ чи сты, ахæмтæ. Доны терапийæ у æхцондзинад хæссæг дзæбæхгæгæн мадзал, психологимæ ахуыртæ та – куысты ахсджиаг хай.
Арт-терапийы архайдтой уазджытæ æмæ сывæллæттæ. Лæппутæ æмæ чызджытæ дзырдтой сæ зæрдæмæ хæстæг цы архайд райстой, уыл. Куклаты театры хъомылгæнинæгтæ равдыстой сæ арæхстдзинад. Ахæм ахуыртæ сты реабилитацийы сæйраг хай.
Сывæллæтты ахуыр кæнынц сæрмагонд ифтонг хæринаггæнæны. Уазджытæн сæхæдæг бацæттæ кодтой фынг. Уый та у кæстæрты тырнындзинад æмæ центры кусджыты дæсныйад æвдисæг.
