Куыстытæ райдыдтой октябры, æмæ фæуыдзысты 2027-æм азы
Æрæфы районы цæуы дондзæуæн хызты бындурон рацарæзт. У егъау проект. Куыстытæ райдыдтой октябры, æмæ фæуыдзысты 2027-æм азы. Æххæстæй ивынц хæтæлтæ, æмæ сæ баиу кæндзысты Æхсæрысæры. Ацы дондзæуæн ифтонг кæны Æрæфы æмæ Дыгуры районты 8 хъæуы. Системæйы ис аварион уаццæгтæ. Модернизаци цæуы, национ проект «Цардæн инфраструктурæ» æххæст кæнгæйæ. Бæлвырддæр хабæрттæ радзурдзæн Хъайтмазты Дзерассæ.
Экскаватор иу иннæйы фæдыл исы Æрæфы зæххы уæлцъар. 2 метрæй фылдæр арфы 2 рæнхъæй сæвæрдзысты полиэтиленон хæтæлтæ. Сæ диаметр – 450 миллиметры. Фæлæггад кæндзысты 50 азы. Специалисттæ куыд зæгъынц, афтæмæй сæ фидардзинад равдыстой. Системæ ног кæнгæйæ нырыккон æрмæгæй арæх фæпайда кæнынц.
Æрæфы районы доны хæтæлты реконструкцимæ бавнæлдтой октябры. Уыцы рæстæгмæ специалисттæ сæвæрдтой ног коммуникацитæ цалдæр хайыл. Иу бригад кусы доны системæ «Сахол»-ырдыгæй – уый у Урухы цæугæдоны хиды районы, иннæ та – Цыколайырдыгæй. Сæмбæлдзысты Æхсæрысæры. Цы территорийыл аххæсдзысты, уый дæргъ уыдзæн 9 километры, хæтæлты дæргъ та – бирæ фылдæр.
Зæронд хæтæлтæ сты ногты фарсмæ. Нырма донæй æххæст кæнынц Æрæфы æмæ Дыгуры районты хъæутæ. Æфсæн æмæ асбест хæтæлты 60 азы эксплуатацимæ арæх уыд къуылымпыдзинæдтæ. Реконструкцийы фæстæ 8 хъæуы доны риссаг фарстатæ лыггонд æрцæудзысты.
Системæ ног кæнынц нацпроект «Цардæн инфраструктурæ»-йы федералон программæ «Коммуналон инфраструктурæйы модернизаци»-мæ гæсгæ. Куыстытæ цæудзысты цалдæр къæпхæнæй 2027-æм азы онг.
