Хорзæхгонд æрцыд Уырыссаг фæсарæнты Хæдзары
Минскы æппæтадæмон фестиваль «Листопад»-ы Гран-при рамбулæг, æрыгон ирон кинематографистты киноныв «Охотник» сси Уæрæсейы кинокритикты æмæ кинойы дæсныты Гильдийы премийы номинант сæрмагонд номинаци «Лучшее визуальное решение»-йы. Хорзæхгонд æрцыд Уырыссаг фæсарæнты Хæдзары. Сюжет арæзт у, нывонд цæрæгой чи фехста æмæ уый тыххæй æрдзæй æфхæрд чи баййæфта, ахæм цуаноны историйыл. Режиссер Цогойты Зауыры сразæнгард кодта Хетæгкаты Къостайы «Дзæбидырдзуан». Кинонывы иу дзырд дæр фехъусæн нæй: арф хъуыды бамбарæн ис сурæттæй, музыкæ æмæ æнкъарæнтæй. Оператортæ Рубайты Руслан æмæ Дзабиаты Георгийы дæсныйады руаджы алы кадрæй дæр рауад таурæгъ, Ирыстоны æрдзæй та – сæйраг таурæгъгæнæг. Киноныв истой Дыгуры æмæ Уæлладжыры кæмтты рæсугъддæр бынæтты. Продюсер у Джиоты Людвиг. Киноныв сисынæн сфæлдыстадон къорд фарон рамбылдта культурон хъæппæристы Президенты фонды грант.
