Уым балхæнæн ис заз бæлæстæ, хъазæнтæ æмæ алыхуызон аивгæнæнтæ
Дзæуджыхъæуы байгом сты Ног азы армукъатæ. Уым балхæнæн ис заз бæлæстæ, хъазæнтæ æмæ алыхуызон аивгæнæнтæ. Специалисттæ амонынц заз бæлас боныгон æлхæнын, цæмæй йæ хъæндзинæдтæ зыной. Сæйрагдæр, æнæмæнг, у йæ хæрздæф. Уый лæвар кæны адæмæн бæрæгбоны æнкъарæнтæ. Бæлвырддæр радзурдзæн Чехойты Фатимæ.
Ног азмæ республикæмæ сластой 6 мин заз бæласæй фылдæр Башкортостанæй, Пермы крайæ æмæ Дæллаг Новгороды облæстæй. Куыд иннæ азты, афтæ та ныр дæр æппæты стырдæр армукъа байгом Олимпаг парчы фарсмæ. Ам ис алцыдæр: бæзджын къалиуджын даргъ хихджын нæзытæй заз бæлæсты онг, се *хсæн – фæсарæнтæй ласт дæр. Дзæуджыхъæуы сарæзтой, Ног азы сæйраг символ балхæнынæн, 7 уæйгæнæн бынаты.
Армукъатæ байгом сты æрæджы, æлхæнджыты нымæц кæны бонæй бон фылдæр. Кæйдæр хъæуы бæрзонд заз бæлас, кæмæндæр та ахсджиаг у йæ хæрздæф. Заз бæлас æлхæнгæйæ кæсын хъæуы йæ хихты хуыз æмæ уавæрмæ. Бур кæнæ хус хъуамæ ма уой. Хъæдæй æрæджы кæй æрластой, ахæм заз бæлас вæййы ирд цъæх. Алы аз бæрæгбоны агъоммæ сæ куыст райдайынц браконьертæ. Уыдон зиан хæссынц æрдзæн. Уымæ гæсгæ фæдзæхст бынæтты æмæ хъæдты райдыдта патрульты куыст. Афтæмæй архайынц бæлæстæ бахъахъхъæнын. Заз бæлас сæрмагонд армукъайы балхæнгæйæ, адæймагæн йæ бон сбæрæг кæнын у, закъонмæ гæсгæ йæ акалдтой, æви нæ. Уый æвдисæн гæххæттытæ æмæ карантины серификат хъуама уой алы уæйгæнæгмæ дæр.
Ног азы армукъатæ кусдзысты 31-æм декабрьмæ. Нырма ис рæстæг заз бæлæстæ балхæнынæн æмæ бæрæгбоны уддзæф банкъарынæн.
