Проект ныридæгæн нымад æрцыд регионты *хсæн наукон конкурсы
Пайдайаг хойрæгтæм цæстæнгас чи аивдзæн, ахæм ахсджиаг проект. Цæгат Ирыстоны паддзахадон университеты студенттæ скодтой, сæкæрнизæй рынчын адæмæн æдас дзул. Йæ сæйраг хицæндзинад у, хыссæйы уазал ферментаци. Проект ныридæгæн нымад æрцыд регионты *хсæн наукон конкурсы. Бæлвырддæр радзурдзæн Хъайтмазты Дзерассæ.
Цæгат Ирыстоны паддзахадон университеты хойрæгты технологиты кафедрæйы магистратурæйы студенткæйы куыст наукон æхсæнады нымад æрцыд. Йæ куыст Гунча Овезгелдиева равдыста Стъараполы, регионты хсæн конференцийы æмæ конкурсы «Фидæны биотехнологитæ». Баст уыд хойрæгтæ цæттæ кæныны инновацион технологитимæ. Проект бацахста æртыккаг бынат.
Дзулыл куыст цæуы лабораторон уавæрты. Гунча проектыл иунæгæй нæ кусы – иртæстыты архайы æрдзон наукæты æмæ технологиты факультеты 4-æм курсы студенткæ Битеты Аделинæ дæр. Уый куыд зæгъы, афтæмæй продукты сконд баззайдзæн хуымæтæг: пайда кæнынц традицион дзул фыцынæн цы хъацæнтæ хъæуы, уыдонæй, фæлæ технологон процесс æндæрхуызон у.
Технологи дæтты, дзулы гликемикон индекс фæныллæгдæр кæнын æмæ туджы сæкæры æмæ инсулины æмвæзад ма ивыны гæнæн. Ахæм продукт бæззы æрмæст сæкæрниз кæмæ ис, уыцы адæмæн нæ, фæлæ йе нæниздзинадмæ цæст чи дары, уыдонæн дæр. Уымæй фæстæмæ ныллæггонд ферментаци хуыздæр кæны дзулы ад, хæрздæф æмæ кондад.
Цæгат Ирыстоны паддзахадон университеты студенткæйы проект гæнæн ис æмæ парахат уыдзæн, куыд дзæбæхгæнæн æмæ профилактикон хойрæгты системæйы, афтæ дзулфыцæн промышленносты дæр.
