Ахуыргæнæндоны селекцион центры ацы хъуыддагыл бирæ азты ахадгæйæ архайынц
Картофы ног мыггæгтæ уадзыны куыст цæуы Хæххон паддзахадон аграрон университеты зæххы хайы Фыййагдоны. Ахуыргæнæндоны селекцион центры ацы хъуыддагыл бирæ азты ахадгæйæ архайынц. Алы картофы бынæн дæр аргъ кæнынц дæсгай бæрæггæнæнмæ гæсгæ. æмæ æрмæст уый фæстæ хуыздæр хуызæгтæ баиу кæнынц. Ног мыггаг рауадзынæн хъæуы 15 азæй фылдæр. Бæлвырддæр радзурдзæн Хъайтмазты Дзерассæ.
1400 метры бæрзæндыл кусынц Хæххон паддзахадон аграрон университеты профессор, наукон кусджытæ æмæ студенттæ. Сæ нысан у картофы селекци. Селекцион уаццагыл сагъд ис ацы пайдайаг зайæгойы 200 хуызæй фылдæр. Зæххæй бынтæ сисын – уый нырма райдиан къæпхæн у, сæйраг куыст уыдзæн фæстæдæр.
Картофы алы бынæн дæр специалисттæ аргъ кæнынц 52 бæрæггæнæнмæ гæсгæ. æвзарынц хуыздæр экземпляртæ, уыдонæй рауаддзысты фидæны мыггæгтæ. Куыст лæмбынæг у æмæ домы æрмæст бæстон зонындзинæдтæ нæ, фæлæ ма фæразондзинад дæр – картофы иу мыггаг рауадзынæн хъæуы 15 азы бæрц.
Иубын картæфтæ ныссадзынц æмæ иннæ аз райсынц талатæ. Радтынц сæ таладонмæ рагагъоммæйы фæлварæнтæм. Уый фæстæ зайæгойтæ ацæуынц сæйраг фæлтæрæнтæ. æмæ æрмæст уый нæ.
Хæххон паддзахадон аграрон университеты селекцион центр кусы тыллæджы æмæ патогентæм фæразон картофы мыггæгтыл, хæххон уавæртыл ахуыр чи уыдзæн, ахæмтыл. Специалистты сæйраг нысан у, хъæууон хæдзарады фæсарæйнаг продукци бынæттонæй ивыны хæстæ æххæст кæнын.
Картофы иу хуыз рауадзынæн хъæуы байтауын 20 мин мыггаджы. Уый у бирæ азты лæмбынæг куыст æмæ размæ цæуыны тырнындзинад.
