Мадзал баст уыди йæ райгуырды 115 азы бонимæ
Национ наукон библиотекæйы ацыд прозаик, публицист, документалист Дзаттиаты Тотырбеджы мысæн изæр. Мадзал баст уыди йæ райгуырды 115 азы бонимæ. Фыссæг-фронтовик, Хъырым æмæ Севастополь, Румыни æмæ Болгари уæгъд кæныны, Цæгатаг æмæ Сау денджызты хæстон цауты архайæг, адæмы уарзон чингуыты автор. Се хсæн – Советон Цæдисы дыууæ хатты хъæбатыр, æфсады инæлар, легендарон æфсæддон разамонæг Плиты Иссæйы æмæ хъуыстгонд тæхæг Дауыраты Илитæйы цардвæндæгты тыххæй чингуытæ. Фæлæ, йæ фæллæйтты сæйрагдæр та у «Хæххон стъалы». Уый дзурæг у Хетæгкаты Къостайы сфæлдыстадыл. Дзаттиаты Тотырбег национ культурæмæ æмæ рауагъдады хъуыддагмæ цы вæрæн бахаста, уымæн аргъ нæй. Мысæн изæрмæ æрбацыдысты Цæгат Ирыстоны фысджыты Цæдисы уæнгтæ, хæстæджытæ, фæсивæд, Дзаттиаты мыггаджы минæвæрттæ.
