Мараты куыст фадат дæтты ирон æвзаг цымыдисаг хъазты руаджы ахуыр кæнын
Дзæуджыхъæуы 26-æм скъолайы ахуырдзау Дзиуаты Марат проект «Ахуырадон хъазт ирон æвзагыл» кæй бацæттæ кодта, уый тыххæй сси Цæгат Ирыстоны Сæргълæууæджы премийы лауреат зонад æмæ техникæйы къабазы. Мараты куыст фадат дæтты ирон æвзаг цымыдисаг хъазты руаджы ахуыр кæнын. Бæстондæр радзурдзæн Чехойты Фатимæ.
Ирон æвзаджы уроктæ кæнынц ирддæр æмæ цымыдисагдæр. Мадæлон æвзаг – хъазты дунейы, алы ныхас дæр – цыргъзонд хæслæвæрды хай. Программæ арæзт у алы кары сывæллæттæн. Рæвдзæй аныгъуылын кæны ахырадон процессы, кæцы уый руаджы сси æнцонæмбарæн. Проектыл бакусын Маратæн уыд йæхи фæнд. Йæхи ныхæстæм гæсгæ, нæ зоны иронау дзурын. Сæйраг нысан уыд мадæлон æвзаг ахуыр кæныны процесс скæнын афтæ, цæмæй уа æнцон æмæ æмбаргæ алкæмæндæр.
Хъазт у ахадгæ. Мараты ахуыргæнджытæ дзы активонæй пайда кæнынц урочыты. Бахастой йæ сæ пълантæм, уымæ гæсгæ ахуырадон процессæн фæуæрæхдæр сты йæ фадæттæ. Марат цы æрфарст сарæзта, уый хатдзæгтæм гæсгæ программæйы руаджы урочытæ систы цымыдисагдæр; скъоладзаутæ фыццæгæмæй иуæндæсæм къласы онг ахуыр кодтой цæрæгойты нæмттæ. Дыууæ азы дæргъы лæмбынæг куыст баиу кодта ахуырад æмæ хъазт.
Проектыл куыст цыдис дыууæ къæпхæнмæ гæсгæ. Маратæн æххуыс кодта йæ ахуыргæнæг Мария Макаренко. Уый хъуыдымæ гæсгæ, программæ у æххæст нымæцон рауагъд, ис дзы æнæкъуылымпыйæ пайда кæнын.
Æппæтуæрæсеон æмвæзады æнтыстдзинад – проект сси конкурс «Фидæнмæ къахдзæфы» 3-аг къæпхæны лауреат. Ныртæккæ Марат йæхи цæттæ кæны йæ царды ног хаймæ – студентон цардмæ. Сæрмагонд хъуыдытæ йæм нæма ис, фæлæ бæлвырдæй зоны – дарддæр кусдзæн ацы къабазы. «Базон цæрæгой» – хуымæтæг хъазт нæу. У хорз дæнцæг, технологи æвзаг хъахъхъæнынæн хорз фадат кæй у, уымæн.
