Систы Дунейы æмæ Европæйы чемпионатты уæлахиздзаутæ æмæ призертæ
Ивгъуыд аз æнтыстджын рауад, тхеквондойæ чи архайы, уыцы спортментæн. Систы Дунейы æмæ Европæйы чемпионатты уæлахиздзаутæ æмæ призертæ. Уыдонæй дыууæйы тыххæй – Гуырцъыты Георгийы æмæ Цакъоты Сæрмæты тыххæй бæстондæр радзурдзæн Чехойты Фатимæ.
Гуырцъыты Георгийæн йæ фæндаг спорты бæрзæндтæм райдыдта йæ ныййарджыты фæндмæ гæсгæ, лæппуйыл 6 азы куы сæххæст, уæд. Уæлахизтæм сæйраг разæнгардгæнæг у йæ фыд. Георгийы хæрзиуджыты хæзнадоны ис алыхуызон майдантæ. Сæ сæйрагдæр – дунейы чемпионат тхэквондойæ цы æвзист рамбылдта, уый. У – дыккаг. Георгий ерыс кæны 58 кг уæзы. Спортмены хъуыдымæ гæсгæ, чемпионатты ахсджиаг у æрмæст хорз цæттæдзинад нæ, фæлæ рог зæрдæйы ахаст дæр. Уымæн та æххуыс – иро зарджытæ.
Белоруссийы иугонд командæйы уæнг Цакъоты Сæрмæт дæр у ерысты æдзух призер. Спортæй архайы 20 азы дæргъы. Европæйы чемпионаты сси уæлахиздзау 68 кг уæзы. Ног командæимæ уый у йæ фыццаг стыр æнтыстдзинад. Тхеквондойы ирон скъолайы хъомылгæнинаг дарддæр тырны ног уæлахизтæм.
Белоруссийы иугонд командæйы сæйраг тренер Аветис Оганесянцы ныхæстæм гæсгæ, тхэквондойы ерысты хæрзиуджытæ рамбулын зын у. Бирæ тыхджын спортсментæ дзы фæархайы. Фæлæ уæддæр лæппутæ сæхиуыл кусынц æмæ дунейы чемпионатты свæййынц уæлахиздзаутæ.
Алы спортсменæн дæр уæлахизмæ ис йæхи фæндаг. Кæд Европæйы æмæ дунейы ерысты хæрзиуджытæ рамбулынц, уæддæр сын сæйрагдæр у Олимпаг чемпионтæ суæвын.
