Ахуыр кæны агрономон факультеты 4-æм курсы
Дæсныйадмæ фæндагыл фыццаг къахдзæфтæ кæнгæйæ стыр бæрзæндтæм хизын. Афтæ зæгъæн ис Хæххон-паддзахадон аграрон университеты студенткæ Габачиты Аланæйы тыххæй. Ахуыр кæны агрономон факультеты 4-æм курсы. Ныридæгæн равзæрст дæсныйадмæ гæсгæ цы наукон архайд кæны, уый тыххæй йæ къухы бирæ æнтыстдзинæдтæ бафтыд. Бæлвырддæр радзурдзæн Хъайтмазты Дзерассæ.
Габачиты Аланæ у хæххон паддзахадон аграрон университеты агрономон факультеты студенткæ. Ис ын бирæ иртæстытæ агротехникæйы æмæ кадастрон хъуыддаджы. Равзæрст къабазы йæхи æнтыстджынæй æвдисы ныр 4-æм аз. Уæвгæ йæм йæ дæсныйадмæ цымыдисдзинад уыдис сабибонтæй.
Аланæйы иртæстыты бындуры сты зæхмæ цæстдарды æмæ разамынды къабазы куыстытæ. Ацы процесстæ ахуыр кæнынмæ фыццаджыдæр хауы арынæты хахнывтæ аразын. Уыдон æххуыс кæнынц, зæххы хай закъонмæ гæсгæ сбæлвырд кæнын æмæ йæ юридикон æгъдауæй снысан кæнын куыд хъæуы, уыцы хъуыддаджы, зæгъы Аланæ.
Иннæ къахдзæф – рацæугæ практикæ. Аланæ йе мкурсонтимæ æмæ ахуыргæнджытимæ арæх горæтæй дарддæр ацæуынц, цæмæй сæ зонындзинæдтæй хъуыддагыл спайда кæной, уый тыххæй. Зæгъæм, кусынц зæххы хæйттæ барыны прибортимæ. Аланæйы ныхæстæм гæсгæ, практикон ахуырты гæнæн ис бæстондæр зонындзинæдтæ райсын фидæны дæсныйады тыххæй.
Габачиты Аланæ кæд студенткæ у, уæддæр æм ныридæгæн ис фæлтæрддзинад. Ацыд практикæ Росреестры управленийы, архайдта паддзахадон геодезион хызы пункттæ бæлвырд кæныны, уыд ма æндæр кусæнуатты. Афтæмæй бамбæрста, ацы дæсныйад йæ зæрдæмæ цæуы æмæ йæ дзæгъæлы нæ равзæрста. Аланæ бацæттæ кодта 20 наукон уацæй фылдæр. Мыхуыргонд сты наукон-практикон конференциты 19 æмбырдгонды. Ис æм бирæ дипломтæ æмæ кады гæххæттытæ Хæххон паддзахадон аграрон университеты йæ къухы цы æнтыстдзинæдтæ бафтыд, уыдоны тыххæй. Студенткæйæн саккаг кодтой республикæйы сæргълæууæджы преми дæр. Йæ ахуыргæнджытæ куыд зæгъынц, афтæмæй Аланæ йæ архайдæй иннæ студентты дæр разæнгард кæны.
Габачиты Аланæйы дæнцæг æвдисы, фыццаг къахдзæфтæ кæнгæйæ дæр гæнæн кæй ис стыр бæрзæндтæм схизын. Æмæ студенткæ дарддæр дæр архайдзæн йæ фидæны дæсныйад иртасыныл.
