Йæ хъомылгæнинаг Карина Раганина рамбылдта Уæрæсейы сæйраг старт паратхеквондойæ
Гæззаты Спартак у, абарæн кæмæн нæй, ахæм иунæг спортсмен. У дунейы 5 хатты чемпион, Европæйы 6 хатты чемпион, дунейы чемпионаты æвзист призер æмæ Уæрæсейы 10 хатты чемпион паратхеквондойæ. Фидар уды хицау, æцæг раздзог æмæ кæстæрæтæн дæнцæгæн хæссинаг адæймаг. 8 азы йыл куы цыди, уæд электрон тыхы аххосæй баззад æнæ къухтæй. Фæлæ йын уый йæ ныфс нæ асаста, æмæ йын фидæны бантыст спорты бæрзæндтæм схизын. Уникалон спортсмен паратхеквондомæ æрбацыд, 40 азы йыл куы цыди, уæд.
Æрæджы Уæрæсейы чемпионаты ногæй рамбылдта. Уыцы бон уыд йæ гуырæнбон. Сæххæст ыл 53 азы. Уымæй дарддæр ма у æнтыстджын тренер дæр. Йæ хъомылгæнинаг Карина Раганина рамбылдта Уæрæсейы сæйраг старт паратхеквондойæ. Турнир арæзт æрцыд Кæсæг-Балхъары. Финалы Каринæ нокаутæй фæуæлахиз йæ ныхмæлæууæгыл Мæскуыйæ. Йæхи уæзы категорийы Каринæ у лидер. Ныртæккæ активонæй йæхи цæттæ кæны Европæйы æмæ дунейы чемпионаттæм.
