Се сфæлдыстадон арæхстдзинад равдыстой 23 архайæджы
Дзæуджыхъæуы ныр 7-æм хатт арæзт æрцыд фестиваль «Играй, фæндыр». Се сфæлдыстадон арæхстдзинад равдыстой 23 архайæджы. Фестиваль саразын у Цæгат Ирыстоны адæмон артситтæ Дзуццаты Сосланы æмæ Хадыхъаты Аллæйы хъæппæрис. Куыд зæгъынц, афтæмæй ацы мадзал сси уникалон фæз аивадон диалогæн. Йæ фæрцы райгуыры ног сфæлдыстадон дуэттæ. Бæлвырддæр радзурдзæн Хъайтмазты Дзерассæ.
Музыкалон поппури иу гримеркæйы. Ам сценæмæ рацæуынмæ цæттæ кæнынц Цæгат Кавказы алы регионтæй артисттæ, иу сæ кæны ирон фæндыр. Хамид Гатажоков Кæсæг-Балхъарæй у. Уымæ дæр ис йæхи фæндыр. Фæлæ йын клавишæты бæсты ис тæнтæ, йæ къухты та цæгъдæн. Хамид алы хатт дæр фестивальмæ æрбаласы рагон национ инструмент, æмæ йын алы хатт дæр равдисы йе *гæрон гæнæнтæ.
Уыцы цымыдисдзинад аивадуарзджыты зæрдæты фыццаг сæвзæрын кодтой фестиваль аразджытæ – Дзуццаты Сослан æмæ Хадыхъаты Аллæ. Сценæйы сæ дуэт æрмæст музыкæйы бæрæгбон нæу, фæлæ адæмы зæрдæтæм чи бахизы, ахæм аивад. Ацы мадзал саразыны хъуыды сæм æрцыд 19 азы размæ, уæдæй фæстæмæ ныр 7-æм хатт цæуы Дзæуджыхъæуы, æмæ алы хатт дæр йæ архайджыты географи уæрæхдæр кæны. Ацы аз сæ курдиат равдыстой 23 адæймаджы.
Музыкалон Дагестан ирон сценæйы. Ацы республикæйы адæмты кафæн культурæтæ баиу сты лезгинкæйы. МАлик Даккаев Хасавюртæй у. Фестивалы фыццаг хатт ис æмæ уайтагъд йæ фæндыры цагъдæй ссардта фæндаг адæмы зæрдæтæм. Музыкант йе сфæлдыстады дзуры йæ райгуырæн зæххы тыххæй, æмæ йын ахæм гæнæн кæй фæцис, уый тыххæй раарфæ кодта фестиваль аразджытæн.
Алы архайæгæн дæр саккаг кодтой хæрзиуæг. Радтой сын дипломтæ, кубоктæ æмæ лæвæрттæ. Ардæм æрбацæуынц ирон фæндырæн кад кæнынæн, æмæ æрмæст уый нæ. Иу сæ кæны зæрдæхæлардзинад дæр. Бирæтæн фестиваль баххуыс кæны ног сфæлдыстадон дуэттæ саразын, кæмæндæр та æцæг хæлæртты ссарын.
Бæрæгбон радон хатт равдыста Кавказы мелодитæ иу кæнынц адæмы, сæ музыкалон сфæлдыстадæн арæнтæ нæй, ис æрмæстдæр сценæ. Æмæ сын уыцы сценæ ныр бирæ азты лæвар кæны фестиваль.
