Йæ сæйраг нысан у – алы хъайтары тыххæй дæр нымæцон архив сæмбырд кæнын, æмæ йæ Æппæтуæрæсеон нымæцон мемориалмæ бахæссын
Цæгат Ирыстоны активонæй æххæстгонд цæуы нæ бæстæйы егъаудæр проекттæй иу «Уæлахизы цæсгæмттæ». Йæ сæйраг нысан у – алы хъайтары тыххæй дæр нымæцон архив сæмбырд кæнын, æмæ йæ Æппæтуæрæсеон нымæцон мемориалмæ бахæссын. Нæ республикæйы проект æххæстгонд цæуы Цæгат Ирыстоны паддзахадон университеты. Абон алкæмæн дæр фадат ис йæ фыдæлты сгуыхтдзинæдты тыххæй радзурын. Хъайтмазты Дзерассæйæн ныхасы бар.
Цæгат Ирыстоны паддзахадон университеты студент Гадзиты Руслан республикæйы фыццæгты æмрæнхъ равæрдта проект «Уæлахизы цæсгæмттæ»-йы сайты йæ фыдæлты – Фыдыбæстæйы Стыр хæсты ветеранты историтæ. Бæрæггæнæнтæ арвитыны размæ уал лæмбынæг æмбырд кодта бинонты архивтæ: хуызистытæ, фыстæджытæ, хиуæтты мысинæгтæ – цæмæй йæ хъæбатырты цардвæндаг базона æмæ йæ бахъахъхъæна æрмæст йæхи бинонтæн нæ, фæлæ æппæт бæстæйæн дæр. Русланæн уый у, сабыр цард чи балæвар кодта, уыдонæн бузныг зæгъыны гæнæн.
Республикæйы проект «Уæлахизы цæсгæмттæ» æххæстгонд цæуы Цæгат Ирыстоны паддзахадон университеты бындурыл. Бæстæйы у егъаудæр патриотон акцитæй иу. Уникалон адæмон архивы баиу уыдзысты 150 милуан адæймагæй фылдæры тыххæй æрмæджытæ.
Проекты хай суæвынæн хъæуы бацæуын сайт «Лица Победы»-мæ æмæ йæм бахæссын фыдæлты тыххæй информаци – хуызистытæ, документтæ, биографи, бинонты мысинæгтæ.
Проект «Уæлахизы цæсгæмттæ» иу кæны фæлтæртæ. Курдиат бадæттын ис ацы аз майы онг.
