Тыджыты Малхаз йæхæдæг дæр у ацы скъолайы рауагъдон
Майрæмададжы скъолайы райдиан кълæсты ахуырдзаутæ фембæлдысты сæрмагонд æфсæддон операцийы архайæгимæ. Тыджыты Малхаз йæхæдæг дæр у ацы скъолайы рауагъдон. 2022-æм азæй фæстæмæ ис тохы быдыры. Хорзæхджынгонд æрцыд Жуковы орденæй. Ныртæккæ йын ис фæлладуадзæн рæстæг, æмæ ссыди йæ райгуырæн хъæумæ. Фембæлд рауад цымыдисаг. Фæсивæд æм лæвæрдтой алыхуызон фæрстытæ, æмæ се мзæххон хъайтарæй истой бæстон дзуæппытæ. Кæстæртæ дæр зæрдиагæй бацæттæ кодтой сæхи. Аив кастысты æмдзæвгæтæ, зырадысты æмæ кафыдысты. Баххуыс сын кодта æрыгон зарæггæнæг Езеты Игорь. Уый акодта патриотон зарджытæ. Майрæмадагæн ис хъæздыг æфсæддон истори. Фыдыбæстæйы Стыр хæсты рæстæг бынæттон цæрджытæ салдæттимæ иумæ хъахъхъæдтой Суаргом. Абон дæр хъæуæй рацæугæ 49 лæппуйы хъæбатырæй сæхи æвдисынц сæрмагонд æфсæддон операцийы зонæйы. Ахæм фембæлдтытæ се ппæтæн дæр сты тынг ахсджиаг, – загътой педагогтæ æмæ ахуырдзаутæ.
