Уыдзæн дзы 200 бынаты, хорз уавæртимæ бæстыхæйттæ æмæ нырыккон инфраструктурæ: хæрæндон, спортивон залтæ, административон блок, медицинон æмæ аивгæнæн кабинеттæ
Цæгат Ирыстоны арæзт цæуы, абарæн кæмæн нæй, ахæм социалон объект – нырыккон хæдзар-интернат ацæргæ æмæ инвалид адæмæн. Уыдзæн дзы 200 бынаты, хорз уавæртимæ бæстыхæйттæ æмæ нырыккон инфраструктурæ: хæрæндон, спортивон залтæ, административон блок, медицинон æмæ аивгæнæн кабинеттæ. Куыстытæ цæуынц, национ проект «Бинонтæ» æмæ федералон проект «Хистæр кар»-мæ гæсгæ. Хъайтмазты Дзерассæйæн ныхасы бар.
Ацæргæ адæмæн æмæ инвалидтæн хæдзар-интернаты арæзтадон фæзы куыст иу сахатмæ дæр не рлæууы. Кусджытæ æххæстæй фесты 4 блокы конструкциты арæзтад, 5-æм æмæ 6-æм корпусты та цæуынц арæзтадон-монтажон куыстытæ. Специалисттæ ма бавнæлдтой мидаивгæнæн куыстыты хаймæ дæр. Объекты ныридæгæн сæвæрдтой сæйраг инженерон коммуникацитæ. Уый фæрцы кусджытæн сæ бон у рахизын штукатурон куыстыты къæпхæнмæ.
Ацы комплексы уыдзæн 200 бынаты. Цæгат Ирыстонæн суыдзæн ахсджиаг социалон объект. Йе нæниздзинад хъыгдард кæмæн у, уыцы адæмы æнцойдзинадæн корпусты сæвæрдзысты 4 нырыккон лифты. Алы къæпхæны дæр куыстыты хæрзхъæддзинад бæлвырд кæнынц фæлтæрдджын специалисттæ. Уымæн æмæ ахæм хуызы кусæнуæттæ хъуамæ дзуапп дæттой æдасдзинады бæрзонддæргонд стандарттæн. Проектмæ гæсгæ уыдзæн æрмæст цæрæн агъуыстытæ нæ, фæлæ ирхæфсынæн дæр æмбæлгæ инфраструктурæ.
Æрвылбон объекты фæллой кæны 130 кусæгæй фылдæр, пайда кæнынц сæрмагонд техникæйæ. Кусæнуаты арæзтад æххæстгонд цæуы национ проект «Бинонты» федералон проект «Хистæр фæлтæр»-мæ гæсгæ. Цæрæн æмæ медицинон комплекстæй фæстæмæ ма, интернаты территорийы уыдзæн парчы зонæ. Тезгъогæнæн фæндæгтæ баиу уыдзысты беседкæтимæ, цæмæй адæм сыгъдæг уæлдæфы сæ фæллад уадзой. Бæстыхайы уыдзæн актон æмæ тренажерты залтæ, библиотекæ, стæй оранжерейæ.
Хистæр фæлтæрæн æмæ инвалидтæн æдзух цæрынæн нырыккон центры арæзтад ратдзæн, фæкæсын кæмæ хъæуы, уыцы адæмæн алывæрсыг æмбæлгæ цæстдард сæххæст кæныны фадат.
