Нырæй фæстæмæ дзы нал уыдзæн, сывæллæттæ кæй нæ бауарзтой, уыцы хойрæгтæ
Дзæуджыхъæуы хойраджы комбинат сног кодта скъолаты меню. Нырæй фæстæмæ дзы нал уыдзæн, сывæллæттæ кæй нæ бауарзтой, уыцы хойрæгтæ. Алы бон дæр комбинат ифтонг кæны 44 муниципалон скъолайы. Уый та у 16 мин сывæллоны. Уæвгæ меню сног кодтой 20%. Темæйыл бæстондæр радзурдзæн Чехойты Фатимæ.
Гречкæ, нагетстæ, фрикасе, булгур дзидзаимæ – Дзæуджыхъæуы хойрæгты комбинат сног кодта сывæллæттæн меню. 44-æм скъолайы ног хæринæгтæй саходыны фадат уыдис ныййарджытæн, горæты мэр Милдзыхты Вячеславæн æмæ администрацийы кусджытæн.
Дзуджыхъæуккаг скъоладзаутæн меню сног кæнынц афæдз дыууæ хатты. Хыгъдæй айсынц, сывæллæттæ кæй нæ фæхæрынц, уыйы хойрæгтæ, ногтыл сæ баивгæйæ. 20 бонмæ менюйы алы бон дæр вæййы æндæр хойрæгтæ. Скъоладзаутæ уарзынц картофджын, пельменитæ, стæй хъæбынтæ картофимæ.
Дзæуджыхъæуы хойрæгты комбинат æмгуыст кæны бынæттон хæдзарæдтимæ – хойраг цæттæ кæнынц республикæйы чи *рзад, ахæм халсартæй. 2022-æм азы муниципалон бюджетæй дихгонд æрцыдысты фæрæзтæ горæты скъолаты хæринаггæнæнтæн нырыккон техникæ балхæнынæн. 2025-æм азы та комбинат райста субсиди 10 милуан сомы бæрц. Уый руаджы бантыст пецтæ æмæ уазалгæнæнтæ баивын.
Дзæуджыхъæуы хойрæгты комбинат æрвылбон ифтонг кæны 44 муниципалон скъолайы – уый та у 16 мин сывæллоны. 67 рæвдауæндонмæ та бахæццæ кæны, хæринаг скæнынæн цы продукттæ фæхъæуы, уыдон.
