Сывæллæттæ дзы ныридæгæн райдыдтой архайын
Цæгат Ирыстоны 9 ахуыргæнæндоны царды уадзын райдыдтой проект «Хъæбысæйхæст скъолатæм». Сывæллæттæ дзы ныридæгæн райдыдтой архайын. Æдæппæтæй программæйы архайынц республикæйы 20 ахуыргæнæндоны. Беслæны 9-æм скъолайы тренировкæ бабæрæг кодтой Паддзахадон Думæйы депутат Таймазты Артур, Уæрæсейы спортивон хъæбысхæсты Федерацийы президент Михаил Мамиашвили æмæ нæ зындгонд спортсментæ. Ахуыртæ байгом кодтой хъуыстгонд атлеттæ – олимпаг чемпион Сидахъаты Зауырбег æмæ Олимпаг хъæзтыты бронзæ призер Найфонты Артур. Программæ «Хъæбысæйхæст скъолатæм» у парти «Иугонд Уæрæсе»-йы проект «Выбор сильных»-ы иу хай. Ахсджиаг у, цæмæй рæзгæ фæлтæр æмхиц кæной æнæниз цардыуагмæ æмæ фидæны уой тыхджындæр. Тренертæн дæр уый у хорз фадат, курдиатджын фæсивæды раиртасынæн. Рæстæгимæ проект парахат кæндзæн спорты иннæ хуызтыл дæр.
