Хæсты быдыры куы фæцæф, уый фæстæ ацы хъуыддаг йæ царды ахсджиаг бынат бацахста
Сфæлдыстад куыд реабилитацийы хуыз. Сæрмагонд æфсæддон операцийы архайæг Годжысаты Сослан ныр 2 азы профессионалон æгъдауæй йæ цард сбаста музыкæимæ. Хæсты быдыры куы фæцæф, уый фæстæ ацы хъуыддаг йæ царды ахсджиаг бынат бацахста. Йемæ иузæрдион у Бибылты Артур. Иумæ скодтой сфæлдыстадон къорд æмæ ныр цæттæ кæнынц хæрзаудæн концертмæ. Бæлвырддæр радзурдзæн Хъайтмазты Дзерассæ.
Ацы рæнхъытæ Годжысаты Сослан ныффыста, сæрмагонд æфсæддон операцийы зонæйы уæвгæйæ. Сфæлдыстадæн цыма бынат кæм нæй, ахæм ран райгуырдысты æфсæддон хæлæртты, хæстон бонты æмæ сабыр царды тыххæй æмдзæвгæтæ. Уæд, фронты, ныффыста 5 уацмысы онг. Фæстæдæр баиу сты музыкæимæ. Куы фæцæф ис, уый фæстæ йын сфæлдыстад сси реабилитацийы хуызтæй иу. Абон æм ис 17 авторон зарæджы.
Сосланмæ æрмæст хæстон цауты архайды фæлтæрддзинад нæй. Бирæ азты архайдта музыкæйæ. Профессионалон æгъдауæй та – фæстаг 2 азы. Абон йæ аивадон фæндагыл йемæ иузæрдион у Бибылты Артур. Иумæ скодтой æфсæддон-патриотон къорд æмæ фæнд кæнынц концерттимæ сæрмагонд операцийы зонæмæ цæуын. Уыимæ, музыкантты ныхæстæм гæсгæ, сæ репертуары æрмæст хæстон тематикæ нæ уыдзæн.
Афгайнаг хæстонты тыххæй зарæг бацæудзæн къорды репертуармæ. Ацы уацмыс Бибылты Артурæн сæрмагонд у. Йæ карьерæ райдыдта тæрхон æххæст кæныны федералон службæйы управленийы сæрмагонд нысаниуæг кæмæн ис, уыцы хайады, уый фæстæ службæ кодта мидхъуыддæгты министрады. Æмæ кæд æфсæддон цауты нæ архайдта, уæддæр ын хæсты темæмæ йæ сабибонтæй сæрмагонд ахаст ис. Музыкæ йын у, Фыдыбæстæ Хъахъхъæнджытæн бузныг зæгъыны гæнæн.
Ног къорды фыццаг къахдзæф суыдзæн хæрзаудæн концерт «С песней к победе». Уыдзæн 21-æм февралы Паддзахадон филармонийы. Сценæмæ рацæудзысты республикæйы иннæ артисттæ дæр. Æппæт фæрæзтæ æрвыст æрцæудзысты сæрмагонд операцийы архайджытæн баххуыс кæнынæн.
