Ахуыргæнæндоны апарахат лауызты хæрздæф
Урсы къуыри сбæрæг кодтой Цæгат Ирыстоны паддзахадон базарадон-экономикон колледжы дæр. Ахуыргæнæндоны апарахат лауызты хæрздæф. Афтæмæй дзы арæзт æрцыдысты адджын гуылтæ æмæ лауызтæ фыцыны дæсныйадæвдисæг ахуыртæ. Студенттæ сæ тыхтæ бафæлвæрдтой кондитерон хъуыддаджы. Æрбахуыдтой уазджыты дæр. Уыдоны хсæн – зындгонд артисттæ, сæрмагонд æфсæддон операцийы архайджытæ, сæ бинонтæ, скъоладзаутæ æмæ рæвдауæндоны хъомылгæнинæгтæ. Сывæллæтты мидбылхудт æмæ музыкæ бæрæгбон скодтой уæлдай зæрдæмæдзæугæ. Уæвгæ ахæм бæрæгбæттæ ацы ахуыргæнæндоны систы хорз традици. Урсы къуыри дæр афтæ. Студенттæ бацæттæ кодтой лауызты равдыст. Сарæзтой дзы æнæхъæн композицитæ – хæдзæрттæ, фидартæ æмæ дидинджыты бæстытæ. Колледжы директор Æбиты Валерий куыд радзырдта, афтæмæй ахæм мадзæлтты фæрцы студенттæ ахуыр кæнынц иумæ кусыныл, традицитæ хъахъхъæныныл æмæ сæ дæсныйад парахат кæныныл.
