Хъазты хуызы дзы ахуыр кæнынц ирон æвзаг
Интернеты ирон сегменты фæзынд ног платформæ «Рудзынг». Хъазты хуызы дзы ахуыр кæнынц ирон æвзаг. Проект у Цæгат Ирыстоны паддзахадон университеты студентты æмæ ахуыргæнджыты иумæйаг архайды хатдзæг. Сайтыл ма куыст цæуы, йæ саразджытæ цæттæ сты платформæ фæхуыздæр кæныны фæдыл фæндонтæм æркæсынмæ. Бæлвырддæр радзурдзæн Хъайтмазты Дзерассæ.
Ирон æвзаг сахуыр кæныны тыххæй нал хъæуы сахатгай чингуыты уæлхъус бадын. Портал «Рудзынг»-ы ацы хъуыддаг сæххæст кæнын ис хъазты хуызы – хæслæвæрдты, дзырдбыдты æмæ уыци-уыциты фæрцы. Парахатдæртæй иу у «Базон дзырд»: 6 хаттæн хъæуы раст дзуапп ссарын, куыд зындгонд хъазты, афтæ, фæлæ ныр ирон æвзагыл. Хъазæн ис куыд компьютеры, афтæ телефоны дæр. Графикæимæ кусы дизайнер Дауыраты Сюзаннæ. Пайда кæны æрмæст национ мотивтæй.
«Рудзынг» у Цæгат Ирыстоны паддзахадон университеты студентты командон куысты хатдзæг. Автортæй иу Персаты Станиславы ныхæстæм гæсгæ, проект техникон æгъдауæй зын разынд æмæ ма йыл ныры онг дæр куыст цæуы – йæ гæнæнтæ æдзух уæрæхдæр кæнынц, хъæзтытæ та æххæстгонд цæуынц ног къæпхæнтæй.
Ирон æвзаг ахуыр кæнынæн хъазæн портал саразыны хъуыды æрцыд математикæйы æмæ информатикæйы кафедрæйы хистæр ахуыргæнæг Мария Макаренкомæ. Проекты сæйраг хæс у, æрмæст ирон æвзаг бахъахъхъæныны хъуыддаджы баххуыс кæнын нæ, фæлæ йæ скæнын нырыккон æмæ фæсивæдæн æмбаргæ.
Фидæны порталы фæзындзæн, иннæ пайдагæнджытимæ ерыс кæныны æмæ æвзаг хæлæрттимæ иумæ ахуыр кæныны гæнæн, ахуыргæнджытæн та сæ бон уыдзæн онлайн кълæстæ нысан кæнын æмæ хæдзармæ куыстытæ дæттын. Математикæйы æмæ компьютерон наукæты факультеты студенттæн «Рудзынг» сси дипломон проект æмæ фыццаг профессионалон фæлтæрддзинад, университетæн та, нырыккон технологитæ мадæлон æвзаджы райрæзтæн æмæ культурæ бахъахъхъæнынæн нырыккон технологитæ куыд æххуыс кæнынц, уый дæнцæг.
