Уыдзæн 16 километры дæргъæн
Дарддæр хæццæ кæны Архонкæйы иувæрсты цæуæг фæндаджы арæзтад. Уыдзæн 16 километры дæргъæн. Баиу æй кæндзысты регионалон фæндаг Дзæуджыхъæу-æрыдон-Цыкола-Лескен-2 -имæ. Ныридæгæн конд æрцыд геодезион бындур. Куыстытæ цæуынц национ проект «Инфраструктурæ цардæн» æххæстгæнгæйæ. Бæлвырддæр радзурдзæн Чехойты Фатимæ.
Цæттæгæнæн куыстытæ хидты хуызæн инженерон конструкцитæ саразыныл конд æрцыдысты фæндаджы дыууæ раны. Дыккаг къæпхæн – сæ бацæуæнты быннаг хай ныффидар кæнын æмæ михтæ ныссадзын. Уыдзысты 6 метры дæргъæн. Уый фадат ратдзæн машинæтæн сæ бынты æнæкъуылымпыйæ цæуынæн. Арæзт уыдзысты дыгай хайттæй, сæвæрдзысты дзы æдасдзинады бырутæ. Сæ дæргъ уыдзæн 72 метры.
Архонкæйы фæрстыцæуæг ног фæндаг раджы хъуыд саразын. Зæронд эксплуатацигонд цæуы 40 азы дæргъы. Нырыккон фæндаггон змæлды домæнтæн дзуапп нæ дæтты. 2 азмæ специалисттæ сараздзысты дыккаг техникон категорийы цыппар хайæ арæзт, фæйнæ дыууæ ныхмæцæуæны кæм уа, ахæм фæндаг. Сæвæрдзысты дзы æдасдзинады бырутæ. Арæзтады сæйраг къæпхæн райдыдта 2025-æм азы кæрон. Бакодтой егъау цæттæгæнæн куыст. Дæрддзæф ранмæ хаст æрцыдысты коммуникацитæ – газы хæтæлтæ æмæ электрон тыхы телты сæджындзтæ. Проектмæ гæсгæ объекты объекты сараздзысты 92 метры дæргъæн хид Джызæлдоны сæрты.
Цæттæгæнæн куыстыты фæстæ бригадæтæ бавналдзысты фæндаггон дарæсы хæйттæ æвæрынмæ, стæй рухсгæнæнтæ фидар кæнынмæ. Уыдон дæр, стæй фистæгæйцæуджытæн къахвæндæгтæ, сараздзысты проектмæ гæсгæ. Подрядон куыстуатæн ахæм объекттыл куыст ногдзинад нæу. Арæзтой сæ республикæйы районты, стæй Мамысоны дæр. Архонкæйы иувæрсты цæуæг фæндаг у Цæгат Ирыстоны стырдæр фæндаггон объект. Фæзындзæн национ проект «Инфраструктурæ цардæн» æххæстгæнгæйæ. Суыдзæн регионалон фæндаг Дзæуджыхъæу-æрыдон-Цыкола-Лескен-2-йы хай.
Транзитон транспортæн хъæуты иуварсцæуæг фæндæгтæ республикæйы саразынвæнд кæнынц 10 азмæ. Цæгат Ирыстоны фæстаг 6 азмæ ахæм фæндæгтæ сарæзтой Цыкола æмæ Мичурины, бындурон цалцæг скодтой Дигорайы иувæрсты цæуæг фæндаг. Ныртæккæ аразынц Дзæуджыхъæуы æмæ Архонкæйы. Ацы объекттæ дзуапп дæттынц æдасдзинады нырыккон домæнтæн. Фæндаггон хызы ахæм рæзт ахсджиаг у транспорты змæлдæн, экономикæйæн, стæй регионы экологийы уавæрæн.
