Уый уыдзæн 3-уæладзыгон бæстыхай райдзаст кълæстимæ æмæ нырыккон ифтонггæрзтимæ
Беслæны дарддæр цæуы сывæллæтты нывкæнынады скъолайы арæзтад. Уый уыдзæн 3-уæладзыгон бæстыхай райдзаст кълæстимæ æмæ нырыккон ифтонггæрзтимæ. Объект аразын райдыдтой ивгъуыд азы, æмæ ныртæккæ куыстытæ сты сæ тæмæны. Ацы хъуыддаг æххæстгонд цæуы национ проект «Бинонтæ»-м гæсгæ. Скъола йæ дуæрттæ хъуамæ байгом кæна ацы аз. Бæлвырддæр радзурдзæн Хъайтмазты Дзерассæ.
Ам арæзтадон куыстытæ райдыдтой ивгъуыд азы æмæ цæуынц нысангонд фæткæй раздæр. Объекты техникон цæттæдзинад аразджытæн дæтты, уыцы иу рæстæг цалдæр хайыл кусын. Ныртæккæ æххæстæй фесты æддаг инженерон хызты куыст æмæ территорийы сæвæрдтой стационарон бырутæ. Ныр специалисттæ амайынц бæстыхайы фæстаг, æртыккаг уæладзыг. Уыцы иу рæстæг фыццаг уæладзыджы активонæй æвæрынц мидæггаг гæрæнтæ. Афтæмæй нысангонд цæуы кабинетты фидæны планировкæ.
Объекты æрвылбон фæллой кæны 30 адæймагæй фылдæр æмæ кусы уæззау техникæйы цалдæр иуæджы. Фидæны скъолайы алцыдæр хыгъд цæуы. Ам байгом уыдзæн 7 кабинеты профессионалон æгъдауæй нывкæнынадæй архайынæн. Ноджыдæр ма 2 хицæн къласы та – декоративон æрмдæсныйадæн. Фæзыдзæн ма керамикæйæ æмæ скульптурæйæ архайыны æрмадзтæ. Специалисттæ сæвæрдзысты сæрмагонд ифтонггæрзтæ æмæ ма суанг цæттæ дзаумæттæ судзæн хицæн пец дæр, цæмæй сывæллæттæн сæ бон уа фенын æлыгæй аивадон сфæлдыст куыд рауайы, уый.
Нырыккон сегменттæй иу суыдзæн графикон дизайны кабинет. Иугонд уыдзæн 3-Д модельтæ кæныны æрмадзимæ. Æххæст уыдзæн нырыккон кусæнгæрзтæй. Уый скъолайы хъомылгæнингæтæн ратдзæн, æрмæст академион аивады бындуртæ ахуыр кæныны нæ, фæлæ ма нымæцон компетенцитимæ зонгæ кæныны фадат дæр. Уыдон нырыккон креативон индустрийы парахат сты. Нывкæнынады скъола суыдзæн æрмæст Беслæны ахсджиаг культурон центр нæ, фæлæ æппæт Рахизфарсы районы. Афтæмæй фылдæр сывæллæттæн сæ бон уыдзæн сфæлдыстадон ахуырад райсын. Куыстытæ æххæстгонд цæуынц национ проект «Бинонтæ»-м гæсгæ. Арæзтад фæнд кæнынц ацы аз сентябрьмæ фæуын.
