Интеллектуалон хъазты архайджытæ систы Дзæуджыхъæуы 5-æм гимназы ахуырдзаутæ
Республикæйы сывæллæтты библиотекæйы мадæлон æвзæгты боны кадæн арæзт æрцыд викторинæ. Интеллектуалон хъазты архайджытæ систы Дзæуджыхъæуы 5-æм гимназы ахуырдзаутæ. Рæзгæ фæлтæр адих сты командæтыл, дзуæппытæ лæвæрдтой уырыссаг æвзаджы историимæ баст тематикон фæрстытæн. Фæсивæды размæ вæрд уыди хæс – æрмæст зонындзинæдтæ нæ, фæлæ арæхстдзинад дæр равдисын. Скъоладзаутæ кастысты зындгонд уырыссаг поэтты уацмыстæ, æмдзæвгæтæ, мысыдысты классикон литературæйæ сæ уарзон рæнхъытæ. Фембæлд саразджытæ куыд загътой, афтæмæй ахæм мадзæлттæ сывæллæттæн æххуыс сты сæ мадæлон æвзæгты хъæздыг хæзнатæм æндæр цæстæй кæсынæн, стæй сæм цымыдисдзинад гуырын кæнынц чингуытæ кæсынмæ.
