Цæмæй сæрмагонд æфсæддон операцийы зонæйы алыхуызон фæрæзтæй цух ма æййафой, уый тыххæй
Змæлд «Согрей солдата»-йы волонтертæ æппæт хъарутæй архайынц не фсæддонтæн баххуыс кæныныл. Цæмæй сæрмагонд æфсæддон операцийы зонæйы алыхуызон фæрæзтæй цух ма æййафой, уый тыххæй. Салдæттæ æнгом æмгуыстад кæнынц волонтертимæ, æмæ Адæмон фронты хайадимæ. Хъайтмазты Дзерассæ радзурдзæн бæстондæр.
Ам алкæмæндæр йæхи истори ис. Дзанæгаты Альбинæ волонтерты æхсæнад «Согрей солдата»-мæ æрбацыд сæ архайд фенынмæ æмæ ам баззад. Алцæуылдæр сахуыр куысты рæстæг. Фыццаг хуыдта хæссæнтæ. Ныр кæны маскировкæгæнæн хызтæн бындур. Куыд зæгъы, афтæмæй лыстæг хъуыддæгтæ бирæ. Ахсджиаг у гæппæлтæ бахуыйын, кæрæттыл бакусын æмæ хъуымацы алы сантиметр дæр хъахъхъæнын.
Змæлд «Согрей солдата»-йы рæнхъыты ис дæсгай сылгоймæгтæ. Кусынц æнæрлæугæйæ. Цæттæ кæнынц маскировкæгæнæн хызтæ, тактикон хæссæнтæ, акъоппы цырæгътæ, аптечкæтæ, эвакуацигæнæн æмæ шлем сусæггæнæн фæрæзтæ. Хуыйынц ма камуфляжон костюм «Леший» дæр. Хæстоны цард аирвæзын кæнынæн цы бахъæуа, æппæт ахæм дзаумæттæ. Снайпертæн тактикон зонттæ фыццаг республикæйы сцæттæ кодтой.
Пенсиисæг Нэлла Ежова 3 азмæ сцæттæ кодта мин хæссæнтæй фылдæр. Маскировкæгæнæн хызтæм куы рахызт, уæд базыдта ног ныв. Ам быйынц дамгъæ G-йы хуызы.
Республикæйы волонтерты организацитæ сты æххуысы стыр хызы ахсджиаг хæйттæ. Бирæтæ æмгуыстад кæнынц Адæмон фронтимæ.
Ацы сылгоймæгтæ хæрзиуджытæм не нхъæлмæ кæсынц. Иу сæ кæны баххуыс кæныны фæндон. Ныхæстыл нæ, фæлæ хъуыддагыл. Афтæмæй фæзынд фидар фæсчъылдым. Æмæ фронты хæстонтæ уый тыххæй зонынц.
